काठमाडौं । संघीय संसद् सचिवालयले संयुक्त राष्ट्रसंघका महासचिव एन्टोनियो गुटेरेसले सम्बोधन गर्ने संसद् बैठकको तयारी तीव्र पारेको छ ।

नेपाल भ्रमणमा रहेका गुटेरेसले भोलि अपराह्न ४ बजे संघीय संसद्को दुवै सदनको संयुक्त बैठकलाई सम्बोधन गर्ने कार्यसूची छ । यसका लागि अन्तिम चरणको काम भइरहेको सचिवालयका प्रवक्ता एकराम गिरीले जानकारी दिए ।

"तयारी अन्तिम चरणमा पुगिसकेको अवस्था छ । अधिवेशन चलिरहेको अवस्था भएकाले सबै सिस्टमहरू रिचेक (पुन: जाँच) गर्ने काम भएको छ । अन्य व्यवस्थापनका कामहरू पनि आवश्यकता अनुसार भइरहेका छन् । भोलि १० बजेसम्म सबै, जे–जे गर्नुपर्ने हो, खासगरी साजसज्जालगायतका सबै काम सकिन्छ ।"

उनले सभामुखको अध्यक्षतामा संयुक्त बैठक सञ्चालन हुने जानकारी दिए । बैठक प्रारम्भ भएसँगै गुटेरेसले सम्बोधन गर्ने कार्यसूची छ । उनको सम्बोधनलगत्तै सोही बैठकले महासचिव गुटेरेसलाई धन्यवाद ज्ञापन प्रस्ताव पारित गर्ने गिरीले बताए ।

प्रवक्ता गिरीले महासचिव गुटेरेसको सम्बोधनलाई संसद् बैठकमै तत्कालै अनुवाद गर्न सक्ने अवस्था नरहेको भन्दै वैकल्पिक व्यवस्था के गर्न सकिन्छ भन्ने सम्बन्धमा छलफल भइरहेको पनि जानकारी दिए ।

"संसद्‌‌मा रोस्टमबाट बोलेको कुरो संसद्‌मा त्यहीँ अगाडि नै रोस्टममा बसेर अनुवाद गरेर अगाडि जान सक्ने अवस्था देखिन्न । अन्य वैकल्पिक के गर्न सकिन्छ भनेर प्रयास भइरहेको छ । उत्तम विकल्प के हुन सक्छ भनेर छलफल भइरहेको छ । निष्कर्षमा पुगिसकिएको छैन," उनले भने ।

उनले महासचिव गुटेरेसको सम्बोधनको संघीय संसद् सचिवालयले नियमित बैठकहरूको जस्तै अभिलेख राख्ने बताए ।