पोखरा । संयुक्त राष्ट्रसंघका महासचिव एन्टोनियो गुटेरेस सोमबार (आज) पोखरा आउँदै छन् । उनको भ्रमण तालिका तय भइसकेको छ ।

कास्कीका प्रमुख जिल्ला अधिकारी वासुदेव घिमिरेका अनुसार सोमबार महासचिव गुटेरेस पोखरामा नै रहनेछन् । सोमबार उनले पोखराकै फिस्टेल लजमा रात बिताउनेछन् ।

उनी मंगलबार बिहान अन्नपूर्ण आधारशिविर जाने कार्यक्रम छ । गुटेरेसको आगमनलाई लक्षित गरी सुरक्षा व्यवस्था मजबुत पारिएको प्रजिअ घिमिरेले जानकारी दिए ।

महासचिव गुटेरेस अन्नपूर्ण आधारशिविर जाने कुराले त्यहाँका पर्यटन व्यवसायी पनि हर्षित छन् । आरोहणका दृष्टिले विश्वकै जेठो हिमालका रूपमा चर्चित अन्नपूर्णको आधारशिविरमा राष्ट्रसंघका महासचिव आउन लागेको विषयले यहाँका पर्यटन व्यवसायी उत्साहित बनेको छोम्रोङ पर्यटन समितिका सचिव दिलीप गुरुङले बताए ।

स्थानीयले गुटेरेसको स्वागतको भव्य तयारी गरेका छन् । जनप्रतिनिधिलगायत अगुवा सोमबार दिउँसोसम्म सो आधारशिविरमा पुग्ने तयारीमा छन् । अन्नपूर्ण आधारशिविरमा सबै व्यवस्थापनको जिम्मेवारी छोम्रोङ पर्यटन व्यवसायी समितिलाई दिइएको छ ।

गुटेरेस केही समय बेसक्याम्पमा रहनेछन् । स्थानीयसँग भलाकुसारी गर्ने कार्यक्रम छ । उनलाई अन्नपूर्ण बेसक्याम्पको फोटो फ्रेममा हालेर कोसेली स्वरूप दिन लागिएको गुरुङले बताए ।

गुटेरेस त्यहाँबाट पोखराको पुरानो विमानस्थलमा फर्कने र पत्रकार सम्मेलन गर्ने भ्रमण तालिका छ ।

चार वर्षअगाडि ०७६ साल कात्तिकमा बंगलादेशका राष्ट्रपति मोहम्मद अब्दुल हमिदले पोखरा भ्रमण गरेका थिए । उनले फेवातालमा डुंगा सयर गरे, रुपाकोट रिसोर्टबाट हिमाल र पोखरालाई हेरे ।

त्यति बेला उनी पोखराको प्राकृतिक सुन्दरतासँग मोहित भएर आफ्नो देश फर्किएका थिए । विदेशी भीभीआईपीका रूपमा बंगलादेशी राष्ट्रपति पोखरा आएको चार वर्षपछि गुटेरेसको भ्रमण हुन लागेको हो ।