काठमाडौं । नेपाल भ्रमणमा रहेका संयुक्त राष्ट्रसंघका महासचिव एन्टोनियो गुटेरेसले नेपाली कांग्रेसका नेताहरूसँग भेटवार्ता गरेका छन् । आइतबार उनले सभापति शेरबहादुर देउवा, नेता डा. शेखर कोइराला, कानुनमन्त्रीसमेत रहेका उपसभापति धनराज गुरुङ, परराष्ट्रमन्त्रीसमेत रहेका नेता एनपी साउदसँग भेटर्वाता गरेका हुन् ।

गुटेरेससँगको भेटका क्रममा कांग्रेस नेता कोइरालाले जलवायु परिवर्तनले नेपालीहरू एकदमै संकटमा परेको बताएका थिए । कोइरालाको सचिवालयले दिएको जानकारी अनुसार भेटमा कोइरालाले महासचिव गुटेरेसलाई एभरेस्ट बेस क्याम्प जाँदा त्यहाँ जलवायु परिवर्तनले नेपालीलाई पारेको असरको सुक्ष्म अध्ययन गरेर विश्व मञ्चमा आवाज उठाइदिन अनुरोध गरेका छन् ।

“तपाईं एभरेस्ट बेस क्याम्प जाँदै हुनुहुन्छ भन्ने सुनेको छु । तपाईं पहिले पनि त्यहाँ गइसक्नुभएको छ । पहिलेको तुलनामा अहिले जलवायु परिवर्तनको असर धेरै परेको छ । नेपालीहरू कति संकटमा छन्, कति समस्या भोगिरहेका छन् भन्ने त्यहाँ पुगेर तपाईंले महसुस गर्नुहुन्छ । विश्व मञ्चमा यो आवाज तपाईंले उठाइदिनुपर्छ भन्नुभयो,” कोइरालाको भनाइ उद्धृत गर्दै सचिवालयले भन्यो ।

चारदिने भ्रमणका लागि महासचिव गुटेरेस आइतबार बिहान नेपाल आइपुगेका हुन् । उनले राष्ट्रपति, प्रधानमन्त्रीसहित नेताहरूसँग भेटवार्ता गरिरहेका छन् ।

महासचिव गुटेरेसले मंगलबार अपराह्न ४ बजे संघीय संसद्को संयुक्त सदनलाई सम्बोधन गर्ने कार्यतालिका छ ।