काठमाडौं । धादिङमा मादक पदार्थ सेवन (मापसे) गरी विवाद भएको छ ।  बिहीबार राति विवाद हुँदा धारिलो हतियार प्रहार गरिएको छ । 

विवादपछि नीलकण्ठ नगरपालिका–१२, दामगाडेस्थितमा ज्याला मजदुरीको काम गर्ने खनियाबास गाउँपालिका–३ का ४४ वर्षीय रामबहादुर तामाङमाथि हतियार प्रहार भएको हो । 

गंगाजमुना गाउँपालिका–४ का ४१ वर्षीय पूर्णबहादुर गुरुङले धारिलो हतियार चक्कु प्रहार गरेको धादिङका डीएसपी सन्तुलालप्रसाद जैसवालले जानकारी दिए । उनका अनुसार मापसे गरी आपसमा विवाद हुँदा चक्कु प्रहार भएको हो । 

चक्कु प्रहारबाट तामाङ घाइते भएका छन् । घाइते भएका उनको जिल्ला अस्पताल धादिङमा सामान्य उपचारपश्चात काठमाडौं पठाइएको छ ।

उनको पेट, खुट्टा र हातमा चोट लागेको छ । प्रहरीले चक्कुसहित गुरुङलाई नियन्त्रणमा लिएको जिल्ला प्रहरी कार्यालय धादिङले जनाएको छ ।