काठमाडौं । चालु आर्थिक वर्ष २०८०/८१ को भदौसम्म देशको शोधनान्तर स्थिति ५३ अर्ब ६१ करोड रुपैयाँले बचतमा छ । गत वर्षको भदौसम्म शोधनान्तर स्थिति घाटामा थियो ।

नेपाल राष्ट्र बैंकले मंगलबार सार्वजनिक गरेको ‘देशको वर्तमान आर्थिक तथा वित्तीय स्थिति’ प्रतिवेदनानुसार भदौसम्म चालु खातामा सुधार भएको देखिएको छ । गत वर्षको सोही अवधिमा शोधनान्तर स्थिति २० अर्ब ८१ करोड रुपैयाँले घाटामा थियो ।

गत वर्षको सोही अवधिमा १६ करोड ३४ लाख अमेरिकी डलरले घाटामा रहेको शोधनान्तर स्थिति चालु आर्थिक वर्षको भदौसम्ममा ४० करोड ५६ लाखले बचतमा छ ।

राष्ट्र बैंकका अनुसार निश्चित समयावधिभित्र आवासीय र गैरआवासीय व्यक्ति–संस्थाबीच भएका आर्थिक तथा वित्तीय कारोबारको सारांश नै शोधनान्तर स्थिति हो ।

शोधनान्तर बचत भएमा बाह्य क्षेत्र कारोबारबाट विदेशी मुद्रा आप्रवाह बढ्छ । घाटा भएमा विदेशी मुद्रा देशबाट बाहिर बढी गएको भन्ने बुझिन्छ ।