काठमाडौं । एनआईसी एसिया बैंकले आर्थक वर्ष २०७९/८० को मुनाफाबाट हाल कायम चुक्तापुँजीको ३०.५२६३ प्रतिशत लाभांश पारित गरेको छ । बैंकको आज सम्पन्न २६औँ वार्षिक साधारणसभाबाट २९ प्रतिशत बोनस सेयर र कर प्रयोजनका लागि १.५२६३ प्रतिशत नगद लाभांश पारित गरेको हो ।

सभाले २९ प्रतिशत बोनस सेयर पारित गरेपश्चात् बैंकको कुल चुक्तापुँजी १४ अर्ब ९१ करोड ७५ लाख ६६ हजार रुपैयाँ पुगेको छ ।

सभाले आर्थिक वर्ष २०७९/८० को सञ्चालक समितिको प्रतिवेदन, लेखापरीक्षकको प्रतिवेदनसहित २०८० असार मसान्तसम्मको वासलात, नाफा–नोक्सान हिसाब तथा नगद प्रवाह विवरणलगायत वार्षिक विवरणहरू उपर छलफल गरी स्वीकृत गरेको छ । त्यस्तै, बैंकको प्रबन्धपत्र र नियमावलीमा संशोधन गर्ने प्रस्ताव समेत पारित गरेको छ ।

एनआईसी एसिया बैंकले मुलुकभर ३६० शाखा कार्यालय, ६३१ एटीएम, ११० वटा विस्तारित काउन्टर र ६१ वटा शाखारहित शाखा सञ्जाल विस्तार गरेको छ ।