काठमाडौं । नेपाली राष्ट्रिय फुटबल टिमका कप्तान किरण चेम्जोङले लाओसविरुद्धको खेलमा दर्शकलाई नेपालको सबैभन्दा ठूलो झन्डा लिएर रंगशाला आउन आग्रह गरेका छन् ।

नेपालले बिहीबार फिफा विश्वकप–२०२६ छनोटको पहिलो चरणको पहिलो लेगमा लाओसलाई आतिथ्यता प्रदान गर्दै छ । त्रिपुरेश्वरस्थित दशरथ रंगशालामा हुने यो खेल अपरान्ह ५ः३० बजेदेखि सुरु हुनेछ । 

खेलको पूर्वसंन्ध्यामा आयोजित पत्रकार सम्मेलनमा किरणले समर्थकलाई रंगशालामै आएर टिमको हौसला बढाउन आग्रह गरे ।

“हामी ठूलो संख्यामा समर्थकहरू रंगशाला आएको हेर्न चाहन्छौँ । भोलि हामी बेग्लै समर्थकको अनुभव गर्न चाहन्छौँ । फुटबल संस्कारसहितको समर्थकको आश गरेका छौँ । ब्यानर, झन्डा, जर्सीसाथ सबैजना रंगशाला आउनुहोला । नेपालको सबैभन्दा ठूलो झन्डा पनि देख्न पाउँ । राष्ट्रिय गान, रातो र चन्द्र सूर्य ९० मिनेट नै गाउनुपर्छ । समर्थकहरूका लागि यो मेरो विशेष आग्रह हो । म रंगशालामा १५ हजारभन्दा धेरै समर्थक आएको हेर्न चाहन्छु । यति कि रंगशालामै नअटोस्,” पत्रकार सम्मेलनमा अधिकांश समय दर्शकका लागि खर्चिएका किरणले भने ।

किरणले आफूले विश्वका अन्य जुनसुकै देशमा फुटबल खेले पनि दशरथ रंगशाला त्यसमध्येका सबैभन्दा उत्कृष्ट मैदान भएको बताए ।

उनी भन्छन्, “मलाई दशरथ रंगशाला सबैभन्दा उत्कृष्ट रंगशालामध्ये लाग्छ । किनभने त्यहाँ ‘टूवेल्थ म्यान’को रूपमा हाम्रा दर्शक हुन्छन् । मैले अरु जहाँ खेले पनि दशरथमा खेलेको अनुभव बेग्लै हुन्छ । यसका लागि म सँधै उत्साहित हुन्छु । ममात्र हैन, टिमका हामी सबै घरेलु समर्थकमाझ खेल्न आतुर छौँ ।”