काठमाडौं । इजरायलको द्वन्द्व प्रभावित दक्षिणी क्षेत्रबाट ५५ नेपालीलाई सुरक्षित स्थानमा सारिएको छ । सोमबार त्यहाँबाट उनीहरूलाई सुरक्षित स्थानमा सारिएको इजरायलका लागि नेपाली राजदूत कान्ता रिजालले जानकारी दिइन् ।
इजरायलको तेल अभिभस्थित नेपाल राजदूतावासका प्रथम सचिव अर्जुन घिमिरेका अनुसार उक्त स्थान प्यालेस्टाइनी लडाकु समूह हमासको नियन्त्रणमा रहेको गाजासितको सीमाक्षेत्र हो ।
त्यहाँबाट ५५ नेपालीलाई इजरायली सेनाले सुरक्षित स्थानमा पुर्याएको राजदूत रिजालले बताइन् ।
“द्वन्द्व प्रभावित दक्षिण क्षेत्रबाट हिजो ५५ नेपालीलाई इजरायलको सेनाले सुरक्षित स्थानमा पुर्याएको छ,” उनले बाह्रखरीसित भनिन् ।
यस्तै, अशान्त रहेको उत्तरी क्षेत्रमा पाँच बंकरमा केही नेपाली विद्यार्थी रहेका उनले बताइन् । त्यहाँबाट उनीहरूलाई अर्को सुरक्षित स्थानमा लैजाने तयारी भइरहेको उनले जानकारी दिइन् ।
“द्वन्द्व प्रभावित उत्तर क्षेत्रमा पाँचवटा बंकरमा नेपाली विद्यार्थी छन्,” उनले भनिन्, “उनीहरूलाई थप सुरक्षित स्थानमा सार्ने तयारी भइरहेको छ । त्यसका लागि बस तयारी अवस्थामा छ । इजरायली सेनाको अनुमति पर्खिरहेका छौँ ।”
अशान्त रहेको उत्तरको उक्त स्थान लेबनानसितको सीमाक्षेत्र भएको प्रथम सचिव घिमिरेले जानकारी दिए ।
गएको शनिबार हमासले एक्कासि इजरायलमा आक्रमण गरेपछि दुईतर्फी द्वन्द्व जारी छ । हमासको आक्रमण परी १० नेपाली विद्यार्थीको मृत्यु भएको पुष्टि भइसकेको छ । पछिल्लो द्वन्द्वमा दुवैतर्फ गरी १५ सयभन्दा बढी मानिसको मृत्यु भइसकेको सीएनएनले जनाएको छ ।
