काठमाडौं । पूर्व खानेपानीमन्त्रीसमेत रहेका सांसद अब्दुल खानले मदरसा शिक्षालाई आधुनिक शिक्षामा राख्न माग गरेका छन् । आज प्रतिनिधिसभाको बैठकमा जनमत पार्टीका सांसद खानले सरकारले संसद्‌मा ल्याएको शिक्षा विधेयकमा मदरसा शिक्षालाई परम्परागत शिक्षामा राखेको विषयमा विमति जनाए । 

“सरकारले संसद्‌मा ल्याएको शिक्षा विधेयकमा मदरसा शिक्षालाई परम्परागत शिक्षामा राखेको छ, यो उचित छैन,” खानले भने, “मदरसा शिक्षालाई आधुनिक शिक्षामा राखियोस् । म जोडदार माग गर्दछु ।”

मुस्लिम आयोगका अनुसार मदरसा धार्मिक र सांस्कृतिक शिक्षा प्रदान गर्ने मुस्लिम समुदायको सबैभन्दा विश्वसनीय शैक्षिक संस्था हो । 

मुस्लिम आयोगले २०७८ सालमा प्रकाशित गरेको एक अध्ययन प्रतिवेदन अनुसार नेपालमा एकहजार १९७ वटा मदरसा दर्ता भएका छन् ।