काठमाडौं । प्यालेस्टाइनी लडाकु समूह हमासले शनिबार एक्कासि इजरायलमा आक्रमण गरेपछि त्यहाँ द्वन्द्व चर्किएको छ । इजरायलले जवाफी आक्रमणले थालेसँगै दुई पक्षबीच लडाइँ जारी छ । इजरायलले युद्धको घोषणा नै गरिसकेको छ ।

द्वन्द्वमा विभिन्न देशका नागरिक फसेका छन् । कतिपयको मृत्यु भएको छ । इजरायलमा आफ्ना नागरिक रहेका देशहरूले उद्धारको प्रयास गरिरहेका छन् । केही देशले आफ्ना नागरिकको उद्धार समेत गरिसकेका छन् ।

नेपालको तयारी
हमासको आक्रमणमा परी इजरायलमा रहेका १० नेपाली विद्यार्थीको मृत्यु भएको छ । अरू केही घाइते छन् । त्यहाँ रहेका नेपालीले उद्धारका निम्ति सरकारसँग आग्रह गरिरहेका छन् ।

युद्धग्रस्त क्षेत्रमा फसेका नागरिकको जतिसक्दो चाँडो उद्धार गर्ने प्रयास भइरहेको परराष्ट्र मन्त्रालयले जनाएको छ । तर, कुन रुटबाट कसरी उनीहरूलाई नेपाल ल्याउने टुंगो लाग्नै बाँकी छ ।

अहिले त्यहाँ उडानमा समेत सहज स्थिति छैन । सोही कारण कहाँबाट कसरी गएर उद्धार गर्न सकिन्छ भन्ने टुंगो लागेको छैन ।

इजरायलमा जारी द्वन्द्व र त्यसको मारमा परेका नेपाली नागरिकबारे आवश्यक निर्णय लिन परराष्ट्रमन्त्री एनपी साउदको संयोजकत्वमा समन्वय संयन्त्र गठन गरिएको छ । त्यहाँ मृत्यु भएका नेपालीको शव यथाशीघ्र स्वदेश ल्याउन विमान तयारी अवस्थामा राख्ने र इजरायली पक्षसँग समन्वय गर्ने संयन्त्रले निर्णय गरेको छ । इजरायलमा रहेका नेपाली नागरिकलाई सुरक्षित ठाउँमा स्थानान्तरणको उपाय खोज्ने निर्णय पनि संयन्त्रले गरेको छ ।

भारतले के गर्दै छ ?
जारी द्वन्द्वका बीच आफ्ना २७ नागरिक इजरायलबाट इजिप्ट पुगेको भारतले जनाएको छ । मेघालय राज्यका मुख्यमन्त्री कोनराड संगमाले उक्त द्वन्द्वग्रस्त क्षेत्रमा फसेका २७ नागरिक भारतीय दूतावासको प्रयासमा सुरक्षित रूपमा इजिप्ट प्रवेश गरेका बताएका हुन् ।

एयर इन्डियाले इजरायलको तेल अभिभबाट आफ्ना चालक दलका सदस्य र अरू दुई कर्मचारीलाई फिर्ता ल्याएको जनाएको छ । इजरायलमा द्वन्द्वमा फसेका विद्यार्थी र नागरिकको उद्धारका निम्ति प्रयास गरिरहेको भारत सरकारले जनाएको छ ।

हंगेरीले गर्‍यो उद्धार
आइतबार रातारात हंगेरीले इजरायलबाट दुई विमानमार्फत २१५ नागरिकको उद्धार गरेको छ । हंगेरीका विदेशमन्त्री पिटर सिज्जार्टोले ती नागरिक राजधानी बुडापेस्टमा सकुशल अवतरण गरेको बताएका छन् ।

बुल्गेरियाको दोस्रो उद्धार उडान
बुल्गेरियाले इजरायलबाट दोस्रो उद्धार उडान गरिसकेको छ । आइतबार बुल्गेरियाले आफ्ना ९२ र एक क्रोएसियाली नागरिकलाई इजरायलबाट राजधानी सोफियामा अवतरण गराएको थियो । बुल्गेरियाले अर्काे उडानमार्फत सोमबार बिहान ८७ नागरिकको उद्धार गरिएको जनाएको छ ।

ब्राजिलको तयारी
ब्राजिलले वायुसेनाका २३० यात्री बोक्ने क्षमताका ६ विमानमार्फत इजरायल र प्यालेस्टाइन छोड्न चाहने नागरिकलाई ‘एयरलिफ्ट’ गर्न तयार रहेको जनाएको छ ।

पहिलो उद्धार उडान सोमबार र मंगलबारको बीचमा हुनेछ । केही ब्राजिलियन नागरिक पहिले नै व्यावसायिक उडानमार्फत स्वदेश फिर्ता भइसकेका बताइएको छ ।

पोल्यान्डले स्वदेश फर्कायो
पोल्यान्डले इजरायलबाट आफ्ना नागरिकको उद्धार सुरु गरिएको जनाएको छ । पोल्यान्डका रक्षामन्त्री मारिउज ब्लास्जाकले सोमबार १२० जना आफ्नो भूमिमा फर्किइसकेको बताउँदै सेनालाई धन्यवाद दिएका छन् ।

थाइल्यान्डको तयारी
थाइल्यान्डले पनि इजरायलबाट आफ्ना नागरिकको उद्धारको तयारी थालिएको जनाएको छ । इजरायल र प्यालेस्टाइनमा जारी द्वन्द्वका क्रममा १२ थाई नागरिकको मृत्यु भएको बताइएको छ ।

लिथुआनिया छलफलमा
लिथुआनियाको राष्ट्रिय संकट व्यवस्थापन केन्द्र (एनकेभीसी)ले हमासको आक्रमणमा परेको इजरायलबाट तीर्थयात्रीलाई फिर्ता ल्याउनेबारे छलफल गरिरहेको जनाएको छ । त्यहाँको परराष्ट्र मन्त्रालयले हालसम्म पाँच लिथुआनियाली नागरिक इजरायल छोड्न सफल भएको जनाएको छ । एजेन्सीको सहयोगमा