काठमाडौं । एकदिवसीय विश्वकपको १३औँ संस्करण अक्टोबर ५ देखि भारतका विभिन्न सहरहरूमा आयोजना हुँदै छ ।

प्रतियोगिताको पहिलो दिन साविक विजेता इंग्ल्यान्ड र न्युजिल्यान्डले प्रतिस्पर्धा गर्ने तालिका छ । विश्वकपको यस संस्करणमा एक एसोसिएट राष्ट्र गरी कुल १० टिम सहभागी छन् । करिब डेढ महिना चल्ने प्रतियोगिताको फाइनल खेल नोभेम्बर १९ मा हुने तालिका छ ।

विश्वकपअघि भारतीय भूमिमा चम्कन सक्ने पाँच बलरहरू यस्ता छन् :

रिस टोप्ले (इंग्ल्यान्ड)
रिस टोप्लेको राष्ट्रिय टिम करियर चोटका कारण उतारचढावपूर्ण रह्यो । गत वर्ष इंग्ल्यान्डले ट्वान्टी–२० विश्वकपको उपाधि जित्दा लिगामेन्टको चोटका कारण टोप्ले टिममा थिएनन् । टोप्लेले २६ एकदिवसीय अन्तर्राष्ट्रिय खेलमा ३८ विकेट लिएका छन् । गत जुलाईमा लर्ड्समा भएको भारतविरुद्ध २४ रन खर्चिएर ६ विकेट लिनु टोप्लेको अहिलेसम्मको उत्कृष्ट बलिङ ‘फिगर’ हो ।

६ फिट सात इन्च अग्ला २९ वर्षीय टोप्लेलाई यही अग्लो कदका कारण पावर प्लेमा ओपनरहरूका लागि समस्या बनाउँछ । यस विश्वकपमा जस बटलरको टिमबाट टोप्ले र क्रिस वोक्सको जोडी नयाँ बलिङ जोडीको रूपमा उदाउन सक्छन् ।

मार्को जान्सेन (दक्षिण अफ्रिका)
दक्षिण अफ्रिकाबाट उदाउँदै गरेका मार्को जोन्सेन कदको हिसाबमा ६ फिट आठ इन्चको कदसहित टोप्लेभन्दा पनि अग्ला छन् । २३ वर्षीय युवा पेसर जोन्सेनले टेस्ट क्रिकेटमा आफूलाई प्रमाणित गरिसकेको भए पनि एकदिवसीय अन्तर्राष्ट्रिय क्रिकेटमा भने आफूलाई सावित गर्न बाँकी नै छ ।

उनले अहिलेसम्म १४ एकदिवसीय क्रिकेटमा १८ विकेट लिएका छन् । तर, अस्ट्रेलियासँगको एकदिवसीय शृंखला ३–२ ले जित्दा ‘म्याच विनर’ प्रदर्शनप्रेरित जोन्सेन दक्षिण अफ्रिकाको विश्वकप खेल्ने टिममा छन् ।

सेप्टेम्बर १७ मा जोहानेसबर्गमा जोन्सेनको ५–३९ को बलिङ ‘फिगर’ र २३ बलमा ४७ रनको ब्याटिङ प्रदर्शनप्रेरित दक्षिण अफ्रिकाले अस्ट्रेलियाविरुद्ध १२२ रनको जित निकालेको थियो । टेम्बा बवुमाको कप्तानीका रहेको दक्षिण अफ्रिकामा मुम्बई इन्डियन्सबाट आईपीएलको अनुभवले जोन्सेनलाई अझ ‘घातक’ बलर बनाएको छ ।

कुलदीप यादव (भारत)
सन् २०१९ को विश्वकपपछि कुलदीप यादवको लय आश्चर्यजनक रूपमा खस्किएको थियो । तर, घरेलु मैदानमा क्रिकेटको महाकुम्भ आयोजनाअघि यादवले आफ्नो स्वभाविक लय फर्काइसकेका छन् ।

२८ वर्षीय अनअर्थोडक्स स्पीनर यादवले यसै वर्षको सुरुआतमा वेस्ट इन्डिज भ्रमणअघि भारतीय टिममा पुनरागमन गरेका थिए । उक्त शृंखलामा यादवले ८.७१ को औषतसहित सात विकेट लिएका थिए । 

त्यसपछि उनी एसिया कपका लागि पनि भारतीय टिममा समेटिए । भारतले प्रतियोगिताको उपाधि जित्दा उनी उत्कृष्ट खेलाडी पनि चुनिए । एसिया कपमा उनले ३.६१ को इकोनोमी रेटसहित नौ विकेट लिएका थिए । भारतभरका स्पिनर मैत्री पिचमा उनी विपक्षी टिमका ब्याटरका लागि विध्वंसकारी बलर बन्न सक्छन् ।

एडम जाम्पा (अस्ट्रेलिया)
छैटौँ पटक विश्वकप जित्ने लक्ष्यसहित भारतीय भूमिमा आएको अस्ट्रेलियाका प्रमुख बलरमध्ये एक हुन्, एडम जाम्पा ।

३१ वर्षीय अनुभवी लेग ब्रेक बलर जाम्पाले एकदिवसीय अन्तर्राष्ट्रिय क्रिकेटमा ८५ क्याप जितेका छन् । अस्ट्रेलियालाई आवश्यक समयमा विकेट दिन माहिर जाम्पाले क्रिकेटको यो संरचनामा १४२ विकेट लिएका छन् । 

गत महिना दक्षिण अफ्रिकाविरुद्धको एकदिवसीय क्रिकेटको बलिङमा सबैभन्दा खराब (०–११३) बलिङ ‘फिगर’ मा आफ्नो नाम लेखाए पनि जाम्पा प्याट कुमिन्सको मध्यक्रम बलिङ सम्हाल्ने प्रमुख हतियार हुन् । जान्सेनजस्तै, जाम्पालाई पनि आईपीएलमा राजस्थान रोयल्सबाट प्राप्त अनुभवले अझ प्रभावकारी बलर बनाएको छ ।

मथिसा पथिराना (श्रीलंका)
२० वर्षीय युवा बलर मथिसा पथिरानालाई ‘बेबी मालिंगा’ को उपनामले पनि चिनिन्छ । श्रीलंकन लेजेन्ड लासिथ मालिंगाको जस्तै बलिङ शैलीका कारण मथिसाले यो उपनाम पाएका हुन् । 

मथिसाले गत जुन ३ मा अफगानिस्तानविरुद्ध राष्ट्रिय टिमबाट एकदिवसीय अन्तर्राष्ट्रिय क्रिकेटमा डेब्यु गरेका थिए । हालसम्म १० खेल खेल्दा उनले आफ्नो खातामा १५ विकेट राखिसकेका छन् । 

चेन्नाई सुपर किंग्सबाट आईपीएल खेल्ने उनी महेन्द्रसिंह धोनीको रेखदेखमा अझ निखारिएका छन् । आईपीएल– २०२३ मा चेन्नाईबाट १२ खेल खेल्दा उनले १९ विकेट लिएका थिए । मालिंगाकै सफलता लयमा रहेका मथिसा यसपटक भारतीय भूमीमा श्रीलंकन टिमका सबैभन्दा घातक बलर बन्न सक्नेछन् ।