काठमाडौं । श्रम स्वीकृति लिएर लगातार एक वर्ष विदेशमा काम गरेर फर्किएकाले जुनसुकै प्रकारको र आकारको एउटा टेलिभिजन साथमा ल्याउँदा भन्सार तिर्नुनपर्ने विमानस्थल भन्सार कार्यालयले जनाएको छ ।

प्रवक्ता अम्बिकाप्रसाद खनालले एक विज्ञप्ति जारी गरेर यस्तो जानकारी गराएका छन् ।

तर श्रम स्वीकृति लिई लगातार १२ महिना काम गरी फर्केको भए पनि सामाजिक सुरक्षा कोषमा सूचीकृत नभएका यात्रुले भने ३२ इन्चसम्मको टेलिभिजनमात्र भन्सार नतिरी ल्याउन पाउनेछन् ।

त्यसबाहेक अन्य अवस्थामा भने सबै टेलिभिजनमा नियमानुसारको भन्सार तिर्नुपर्नेछ ।  मोबाइलको हकमा भने विदेशबाट फर्किने नेपाली यात्रुले आफूले प्रयोग गरिरहेको मोबाइल साथमा ल्याउँदा भन्सार तिर्नुपर्दैन । 

श्रम स्वीकृति लिएर लगातार ६ महिना भन्दा बढी विदेशमा काम गरेर फर्किएका व्यक्तिले थप एक नयाँ फोन ल्याउन पाउनेछन् । तर भन्सार कार्यालयमा घोषणा भने गर्नुपर्नेछ ।