काठमाडौं । उपप्रधान एवं गृहमन्त्री नारायणकाजी श्रेष्ठले सडक दुर्घटनाको क्षति कम गर्नुपर्ने आवश्यकता औँल्याएका छन् । आइतबार सडक सुरक्षा तथा ट्राफिक सचेतना सप्ताह–२०८० का अवसरमा आयोजित कार्यक्रममा उनले यस्तो बताएका हुन् ।

उनले सहज ढंगले यातायात सञ्चालन गर्ने वातावरण बनाउनु अहिलेको आवश्यकता भएको बताए । महानगरपालिका, ट्राफिक प्रहरी, नगरपालिकाहरू, यातायात व्यवस्था विभाग सबै निकाय मिलेर एकीकृत योजना बनाएर अघि बढे मात्र यातायात क्षेत्रको व्यवस्थापन गर्न सकिने उनले उल्लेख गरे ।

उनले पछिल्ला १० वर्षमा सशस्त्र द्वन्द्वको समयमा भन्दा सडक दुर्घटनाका कारण बढी मानिसको मृत्यु भएको बताए ।

“हामीले सडक दुर्घटनाबाट धेरै ठूलो क्षति व्यहोर्नु परिरहेको छ । १० वर्षको सशस्त्र संघर्षका क्रममा मृत्युकै कोणबाट जति नेपाली दाजुभाइ दिदीबहिनीहरूको मृत्यु हुन पुग्यो, पछिल्लो १० वर्षमा सशस्त्र द्वन्द्वको समयको भन्दा वा त्योभन्दा बढी नै दुर्घटनाबाट मृत्यु भएको छ,” उनले भने ।

गृहमन्त्री श्रेष्ठले सार्वजनिक यातायात नबढाएसम्म सडकको स्थिति राम्रो भए पनि धान्न नसक्ने बताए ।