काठमाडौं । नेपाली कथानक चलचित्र ‘परदेशी–२’को बागलुङमा प्रिमियर गरिएको छ । चलचित्रका शीर्ष अभिनेता प्रकाश सपूतको गृहजिल्लामा बागलुङमा शुक्रबार प्रिमियर गरिएको हो । 

प्रिमियरमा उपस्थित हुनेहरूले चलचित्रले नेपाली समाजको कथा भनेको प्रतिक्रिया दिएका छन् । बागलुङ नगरपालिकाका नगरप्रमुख वसन्तकुमार श्रेष्ठले परदेशको सपना देख्ने आम नेपालीको कथाले आफ्नो मन छोएको बताएको निर्माण पक्षले जारी गरेको प्रेस नोटमा उल्लेख छ । 
 
अभिनेता प्रकाश सपूतले आफ्नै जन्मठाउँमा जिल्लाबासीसँग बसेर चलचित्र हेरिरहँदा फरक अनुभूति भएको बताए । उनले चलचित्रमा आफ्नो इन्ट्री हुँदै गर्दा दर्शकबाट आएको ‘हुटिङ’ले पुराना दिन सम्झाएको बताए । 

अभिनेत्री केकी अधिकारीले राजधानीबाहिरको प्रियिमरमा सहभागी हुन पाउँदा फरक अनुभूति गरेको बताइन् । उनले प्रदर्शनको दुई साताअघि प्रिमियर हुँदै गर्दा ‘नर्भस’ महसुस भए पनि चलचित्र हेरिसकेपछि सबैको सकारात्मक प्रतिक्रियाले खुसी लागेको बताइन् । 

निर्देशक नारायण रायमाझीले चलचित्र दर्शकलाई मन छुने बनेको रहेछ भन्ने प्रिमियरपछि महसुस गरेको बताए । “आफ्नो चलचित्रलाई आफैले मूल्यांकन गर्न सकिँदैन । तर दर्शकको बीचमा बसेर चलचित्र हेरिरहँदा रमाइलो पनि उत्तिकै गर्नुभएको थियो,” उनले भने, “भावनामा पनि उत्तिकै डुब्नुभएको थियो । सबैलाई मन छुने चलचित्र बनेको रहेछ भन्ने महुुस भयो ।” 

असोज २६ गतेबाट प्रदर्शनमा आउने तयारीमा रहेको चलचित्रले युवापुस्तामा बढ्दो विदेश मोहको कथा भन्छ । चलचित्रमा प्रकाश र केकीसँगै वर्षा शिवाकोटी, प्रशान्त तामाङ, दीलिप रायमाझी, नीर शाह, रमा थपलियालगायत कलाकारको अभिनय छ । 

रमेश बिजीको कथा एवं पटकथा लेखन रहेको चलचित्र राजेश बंशल र निर्देशक नारायण रायमाझीले संयुक्त रूपमा निर्माण गरेका हुन् ।