काठमाडौं । नेपाली कांग्रेसको केन्द्रीय समिति बैठक स्थगित भएको छ । दिउँसो १ बजेका लागि डाकिएको बैठक झन्डै डेढ घण्टा ढिलो सुरु भएको थियो ।

चिया ब्रेकअघिसम्म बैठकलाई पार्टीको फेसबुक पेजमार्फत प्रत्यक्ष प्रसारण गरेको कांग्रेसले चिया ब्रेकपछि भने लाइभ गरिएन । त्यसपछि बैठक भोलि बिहान ११ बजेसम्मका लागि स्थगित गरिएको हो ।

भोलिको बैठक लाइभ हुने/नहुनेबारे जानकारी गराइएको छैन । 

आज सुरुमा सभापति शेरबहादुर देउवा बोलेर आठ नेतालाई केन्द्रीय सदस्य मनोनीत गरेको जानकारी दिएका थिए । उनले अझै धेरैजना महत्त्वपूर्ण व्यक्तिहरू छुटेको भन्दै केन्द्रीय समितिमा ल्याउन नसकेकाहरूलाई महासमितिमा मनोनीत गर्ने बताएका थिए ।

उनीपछि महामन्त्री गगन थापाले अघिल्लो बैठकले गरेका निर्णय कार्यान्वयनको प्रगतिविवरण र तत्कालीन योजनाहरू प्रस्तुत गरेका थिए । महामन्त्रीपछि सात प्रदेशमा प्रदेश सभापतिहरू, उपसभापति पूर्णहादुर खड्कासहितले आफ्नो धारणा राखेका थिए ।