काठमाडौं । नेपाली कांग्रेसको केन्द्रीय सदस्यमा मनोनीत भएसँगै चन्द्र भण्डारी सानेपा पुगेका छन् । कांग्रेसका सभापति शेरबहादुर देउवाले भण्डारीलाई बिहीबार नै केन्द्रीय सदस्य मनोनीत गरेका हुन् ।
केन्द्रीय सदस्य मनोनीत गरेको जानकारी केन्द्रीय समिति बैठक सुरु हुने समयमा मात्र गराए पनि भण्डारी भने केन्द्रीय समिति बैठकमा सहभागी हुने तयारीसहित सानेपामा पुगेका थिए ।
१४औँ महाधिवेशनमा शेखर कोइराला समूहबाट उपसभापतिमा चुनाव लडेका भण्डारी पराजित भएका थिए । शेखर समूहबाट भण्डारी र धनराज गुरुङ तथा देउवा समूहबाट पूर्णबहादुर खड्का र विजय गच्छदार उपसभापतिमा चुनाव लडेका थिए । दुवै समूहबाट एक–एक जना उपसभापति निर्वाचित हुँदा दुवै तर्फका एक–एक जना पराजित भएका थिए ।
शेखर समूहबाट भण्डारी पराजित भए भने देउवा समूहबाट गच्छदार पराजित भएका थिए । उपसभापति पराजित भएपछि कार्यालयमा नदेखिएको भण्डारी गत फागुन–४ गते घरमै ग्याँस सिलिण्डर विस्फोट हुँदा जलेर घाइते भएका थिए ।
त्यही घटनामा आमा गुमाएका भण्डारी मुम्बइस्थित नेसनल बर्न अस्पतालमा उपचार गराएर फर्किएपछि राजनीतिमा संसद्बाट सक्रियता सुरु गरेका थिए । डाक्टरले अझै स्वास्थ्य सावधानी अपनाउन सुझाव दिए पनि भण्डारी भने विस्तारै राजनीतिक सक्रियता देखाउन थालिसकेका छन् ।
