काठमाडौं । सरकारले नेपाली सेनाको सहायक रथीको विशेष पदमा यमबहादुर अधिकारीको दोस्रो पटक पदावधि थप गरेको छ । 

पूर्वमाओवादी लडाकु अधिकारी सेना समायोजनअन्तर्गत नेपाली सेनामा प्रवेश गरेका थिए । 

मन्त्रिपरिषद्को गत साता बसेको बैठकले सहायक रथीको विशेष पदमा अधिकारीको दोस्रो पटक पदावधि तीन वर्षको लागि थप गर्ने निर्णय गरेको हो । 

नेकपा (माओवादी केन्द्र)का अध्यक्ष पुष्पकमल दाहाल 'प्रचण्ड' प्रधानमन्त्री रहेको बेला अहिले उनको पदावधि दोस्रो पटकको लागि थप गरिएको हो ।

यसअघि सहायक रथी अधिकारीको पदावधि विशेष पदमा चार वर्षको लागि थप गरिएको थियो । 

“नेपाली सेनामा सहायक रथीको विशेष पदमा कार्यरत सहायक रथी यमबहादुर अधिकारीको पहिलो चार वर्षे पदावधि समाप्त हुने मिति २०८० भाद्र ३१ गतेबाटै लागु हुने र सहायक रथी दर्जाको विशेष पदलाई निरन्तरता दिने गरी दोश्रो पटक तीन वर्षको पदावधि थप भएको छ,” नेपाली सेनाको जनसम्पर्क तथा सूचना निर्देशनालयले बिहीबार विज्ञप्ति जारी गर्दै भनेको छ । 

पदावधि थपसम्बन्धी नियमित प्रक्रिया अनुरुप नै सैनिक ऐन तथा नियमावलीको आधारमा यो निर्णय भएको दाबी सेनाले गरेको छ ।