काठमाडौं । नेपाल उद्योग परिसंघका अध्यक्ष राजेशकुमार अग्रवालले सरकारले उद्योगीलाई अपराधीजस्तो व्यवहार गरेर थुन्ने गरेकाले उद्योगी त्रासमा रहेको बताएका छन् । शुक्रबार परिसंघले आयोजना गरेको २०औँ वार्षिकोत्सवको अवसरमा आयोजित कार्यक्रममा अग्रवालले सरकारको व्यवहारले व्यवसायी हैरानीमा परेको बताए ।
"सरकारले उद्योगीलाई गरेको पछिल्लो व्यवहारले उद्योगी त्रासमा छन् । उद्योगीलाई थुन्ने प्रवृत्तिले लगानीकर्ता हतोत्साहित भएका छन्," उनले भने, "उद्योगीलाई प्रहरी लगाएर दण्डित गर्नुभएन । ठूलो अपराध हो भने ठिक हो । तर, जे मा पनि हतकडी लगाउँदा बजारमा नकारात्मक सन्देश गयो ।"
आमजनताले सबल अर्थतन्त्रको आशा गरेको भन्दै अध्यक्ष अग्रवालले त्यसतर्फ सरकारको ध्यान हुनुपर्ने बताए ।
"आमजनताले गणतन्त्र र लोकतन्त्रमात्र हैन सबल अर्थतन्त्र चाहेका छन् । बजेटको सफल कार्यान्वयले मात्र विकास सम्भव छ," उनले भने ।
अहिले खर्च गर्ने आत्मबल घट्दा बजारमा मन्दी छाएको उनको भनाइ छ । नियमन निकायले भ्रम सिर्जना गर्ने काम गरेकाले पनि समस्या निम्तिएको अग्रवाल बताउँछन् ।
"अर्थतन्त्रलाई डिप्रेसनमा जानबाट रोकौँ प्रधानमन्त्रीज्यू, पूर्वधार क्षेत्रमा सरकारी खर्च बढाउनुपर्यो अनि मात्र बजारमा पैसा आउँछ," उनले भने ।
