काठमाडौं । प्रधानमन्त्री पुष्पकमल दाहाल ‘प्रचण्ड’ले श्रम आप्रवासनसम्बन्धी समस्या र समाधानका विषयमा केन्द्रित रहेर विदेशस्थित नेपाली कूटनीतिक नियोगका प्रमुखहरूसँग छलफल गरेका छन् । सोमबार बिहानदेखि सिंहदरबारस्थित प्रधानमन्त्री तथा मन्त्रिपरिषद् कार्यालयमा सुरु भएको पहिलो चरणको बैठक अपराह्न सकिएको छ ।

बैठकमा वैदेशिक रोजगारसहित आप्रवासी नीतिमा रहेको चुनौतीका बारेमा १३ देशका राजदूतहरूसँग छलफल गरिएको हो । कूटनीतिज्ञले अन्तर्राष्ट्रिय श्रमबजारसँग सम्बन्धित समस्या समाधानबारे धारणा राखेका थिए ।

अन्तरक्रियामा श्रम, रोजगार तथा सामाजिक सुरक्षा मन्त्रालयका सचिव केवलप्रसाद भण्डारीले श्रम आप्रवासनका सवाल र कूटनीतिक नियोगको भूमिका विषयमा संक्षिप्त अवधारणा प्रस्तुत गरेका थिए ।

पहिलो चरणको बैठक समापनपछि सञ्चारकर्मीसँग कुरा गर्दै श्रम, रोजगार तथा सामाजिक सुरक्षामन्त्री शरतसिंह भण्डारीले राजदूतहरूले आ–आफ्नो मुलुकको समस्या र समाधानका उपाय बताएको जानकारी दिए । राजदूतहरूले राखेका समस्या टिपिएको र श्रम मन्त्रालयले त्यसको समाधान गर्नेतर्फ काम गर्ने उनले बताए ।

निर्देशिका, कार्यविधि परिवर्तन गरेर भए पनि वैदेशिक रोजगारलाई व्यवस्थित र श्रमिकको हकहित, मानवअधिकारलगायत पक्ष सुदृढ बनाउने सरकारको लक्ष्य रहेको उनले सुनाए । वैदेशिक रोजगारीमा रहेका श्रमिकमाथि सरकारको जिम्मेवारी हुने उनले उल्लेख गरे । वैदेशिक रोजगारीमा गएका श्रमिकको साथमा सरकार छ भन्ने महसुस गराइने उनको भनाइ छ ।

अवधारणापत्रमा श्रम आप्रवासनका मुख्य १० गन्तव्यमा कतार, मलेसिया, साउदी अरब, संयुक्त अरब इमिरेट्स् (यूएई), कुवेत, बहराइन, दक्षिण कोरिया, ओमान, जापान, रोमानिया रहेको उल्लेख छ । नेपाली श्रमिकले वैदेशिक रोजगारीका क्रममा भोग्नुपरेका विभिन्न समस्या समेत उल्लेख गरिएको छ । त्यसको समाधानका विकल्प प्रस्तुत गरिएको छ ।

अन्तरक्रिया सोमबार र मंगलबार दुई दिन हुनेछ । अन्तरक्रियामा मंगलबार प्रधानमन्त्री प्रचण्डले सम्बोधन गर्नेछन् ।