काठमाडौं । यूएस ओपनको फाइनलमा ड्यानियल मेड्भेडेभलाई हराउँदै नोभाक जोकोभिचले कीर्तिमानी २४औँ पटक ग्रान्डस्लामको उपाधि जितेका छन् ।

आइतबार भएको फाइनलमा सर्वियाका ३६ वर्षीय स्टार जोकोभिचले रुसका मेड्भेडेभलाई ६–३, ७–५ (५), ६–३ को सेटमा हराउँदै दशौँपटक यूएस ओपनको उपाधि जितेका हुन् । यो उपाधिसँगै जोकोभिच यूएस ओपनको उपाधि जित्ने सबैभन्दा पाका खेलाडी बने ।

यसअघि, यो कीर्तिमान अस्ट्रेलियाका पूर्वटेनिस स्टार केन रोसवेलको नाममा थियो । उनले सन् १९७० मा ३५ वर्षको उमेरमा यूएस ओपनको उपाधि जितेका थिए ।

जोकोभिच ओपन ग्रान्डस्लामको इतिहासमा २४ उपाधि जित्ने पहिलो पुरुष खेलाडी बने । उनी पछि रहेका राफेल नाडालले २२ उपाधि जित्दा रोजर फेडेररले २० उपाधि जितेका छन् ।

नाडाल जनवरीयता चोटका कारण कोर्टमा उत्रिएका छैनन् । यस्तै, फेडेररले भने गत वर्ष नै टेनिस र्याकेट झुन्ड्याउने निर्णय गरिसकेका छन् ।