काठमाडौं । आउँदो मंगलबार अर्थात् सेप्टेम्बर १२ मा आइफोन १५, एप्पल वाचलगायत नयाँ घोषणा गर्न एप्पल इभेन्ट गरिँदै छ । उक्त इभेन्टमा के–के नयाँ घोषणाको सम्भावना छ भन्ने केही पूर्वानुमान गरिएको छ ।

इभेन्टको नाम वन्डरलस्ट राखिएको छ । इभेन्ट क्यालिफोर्नियाको कपर्टिनोस्थित एप्पल पार्कबाट प्रत्यक्ष प्रसारण गरिनेछ ।

आइफोन १५ मा यूएसबी टाइप–सी
आइफोन १५ सिरिजअन्तर्गतका फोनमा यो वर्ष सबैभन्दा महत्त्वपूर्ण भिन्नताका रूपमा यूएसबी टाइप–सी चार्जर सपोर्ट हुने ठानिएको छ । लाइटनिङ कनेक्टरको सट्टा आइफोनमा पहिलोपटक टाइप–सी चार्जर ल्याउन लागिएको हो ।

गत वर्ष नै एप्पलले युरोपियन युनियनको नियम पालना गर्ने बताएकाले यसलाई आश्चर्यजनक भने मानिएको छैन । बढीभन्दा बढी चार्जरहरूको पुनः प्रयोग र विद्युतीय फोहर कम होस् भन्ने उद्देश्यले ईयूले सबै फोनमा एउटै किसिमको चार्जर हुनुपर्ने नीति ल्याएको थियो ।

आइफोन १५ अन्तर्गतका सबै फोनमा ३५ वाटको चार्जिङ स्पिड हुने ठानिएको छ ।

यस्तै, आइफोन १५ का सबै मोडेलमा डायनामिक आइल्यान्ड हुने अनुमान गरिएको छ । सबै फोनमा अल्ट्रा वाइडब्यान्ड चिप पनि हुने अपेक्षा गरिएको छ ।

दुवै प्रिमियम मोडलमा म्युट टगललाई प्रतिस्थापन गरी एक्सन बटन हुने र त्यसले सर्टकटका रूपमा काम गर्न सक्ने अनुमान गरिएको छ । आइफोन १५ प्रो म्याक्सको रिब्रान्डिङ हुन सक्ने आकलन पनि गरिएको छ ।

एप्पल वाच
एप्पले सिरिज ९ को वाच सार्वजनिक गर्ने ठानिएको छ । तर, यो सिरिजको घडीको साइज ९९ एमएम, टिटानियमको केस र ए१५ प्रोसेसर रहेको एस९ चिप रहने ठानिएको छ । ब्यान्डमा म्याग्नेट र पिंक कलर अप्सनलगायत केही परिवर्तन नयाँ वाचमा हुने अपेक्षा गरिएको छ ।

एयरपड्स प्रोमा पनि यूएसबी सी टाइप
आइफोन १५ मा मात्र नभएर एप्पलको एयरपड्स प्रोमा पनि यूएसबी टाइप–सी चार्जर सपोर्ट हुने अनुमान गरिएको छ । एयरपड्स प्रोमा अरू उल्लेखनीय अपडेट आउने विषय भने बाहिरिएको छैन ।

यस्तै, एप्पलले ९९ अमेरिकी डलर मूल्य पर्नै सस्तोखाले नयाँ एयरपोड्स पनि सार्वजनिक गर्ने ठानिएको छ । एयरपड्स प्रोमा सफ्टवेयर अपडेटसँगै केही थप फिचरको अपेक्षा गरिएको छ ।

आईओएस १७, म्याकओएस सोनोमा
नयाँ आइफोन र वाच ल्याइँदा आईओएस १७ र वाचओएस १० रिलिज हुने डेट पनि इभेन्टमा घोषणा गरिने ठानिएको छ । आइप्याडओएस १७ र म्याकओएस सोनोमा सार्वजनिक हुने मिति समेत थाहा हुनसक्छ ।

यी सबै अपरेटिङ सिस्टमको बेटा संस्करण भने केही समययता सार्वजनिक भइसकेको छ । आईओएस १७ मा स्ट्यान्डबाइ मोड, भ्वाइसमेल ट्रान्सक्रिप्सन र एक जर्नल एपसहित साना तर महत्त्वपूर्ण अपग्रेड देखिएको छ । म्याकओएस सोनोमामा विजेट, गेम मोड र सफारीमा प्रोफाइलसहित अपग्रेड भएको छ ।

आइप्याडओएस १७ मा भने लक स्क्रिन, इन्टरएक्टिभ विजेट, हेल्थ एप, यूएसबी वेबक्याम र क्यामेराका लागि सपोर्ट आउन सक्छ ।

वाचओएस १० मा पनि अपडेटका रूपमा विजेट हुने अनुमान गरिएको छ । वाचओएस १० मा टोपोग्राफिक म्यापिङ, मुड लगिङ र थप वाचफेस  हुनसक्छ ।

यसबाहेक इभेन्टमा के–के नयाँ प्रडक्ट, सिस्टम र सफ्टवेयर सार्वजनिक गरिन्छ भन्ने सोही दिन थाहा हुनेछ । एप्पलको इभेन्ट वेबसाइट र युट्युब च्यानलमार्फत लाइभ हेर्न सकिनेछ ।