काठमाडौं । सरकारले सञ्चालन गरेको ‘हेलो सरकार’को टोलफ्री नम्बर ११११ मा आज एकै दिन ३११ वटा फोन आएको छ ।

पोर्टलमा आएका र पोर्टलमार्फत् आएका २०० गुनासो सम्बन्धित निकायमा पठाइएको छ । आज आएको गुनासोमध्ये ५५ वटा फछर्यौट भएको जनाइएको छ ।

श्रम ऐन २०७४ को दफा १०६ बमोजिम हल्कारा पदमा नियुक्त भएको व्यक्तिले न्यूनतम पारिश्रमिक नपाएको गुनासो धेरै आएको प्रधानमन्त्री तथा मन्त्रिपरिषद्को कार्यालयले जनाएको छ ।

महंगी बढेको, ग्याँसको भाउ बढेको, सडकमा खाल्डाखुल्डी भएकोदेखि लम्पी स्किन रोगको नियन्त्रणको माग गरेका छन् ।

विश्वस्तरीय क्रिकेट रंगशाखाको बजेट विनियोजन, कीर्तिपुर रंगशालामा फ्लड लाइट छिटो राख्न सुझाव दिएका छन् ।

बाँदरको समस्याले गाउँबाट पलायन हुने अवस्था सिर्जना भएकाले समाधानका लागि अनुरोध गरेको छ ।  

गुनासोहरू भाइबर, फोन, वेवपोर्टल तथा अन्य सामाजिक सञ्जालमार्फत् आएका छन् ।

हेलो सरकारमा आएका गुनासोहरू गुनासोको प्रकृति हेरी सम्बन्धित निकायमा पठाई समस्या समाधानमा सहजीकरणसमेत गरिएको छ ।

सामाजिक सञ्जालमा गुनासोको संख्या अत्याधिक रहेको प्रधानमन्त्रीको सचिवालयले जनाएको छ ।

हेलो सरकार २४ सै घण्टा सञ्चालनका लागि तीन सिफ्टको कार्यतालिका निर्माण गरी सोहीअनुरूप कर्मचारी व्यवस्थापनसमेत गरिएको छ । त्यसका लागि नेपाल सरकारका तीन उपसचिवसहित २५ जना कर्मचारीहरू खटाइएको सचिवालयले जनाएको छ ।