काठमाडौं । सत्तारुढ दल नेपाली कांग्रेसका सांसद तथा केन्द्रीय सदस्य अर्जुननरसिंह केसीले पार्टीमा दाइ–भाउजू प्रवृत्ति हावी भएको बताएका छन् ।
मंगलबार पार्टीको चितवन क्षेत्र नं २ को क्षेत्रीय सम्मेलनलाई सम्बोधन गर्दै उनले पार्टीमा मौलाएको नातावादको विकृत रुपले पार्टी उँभो नलाग्ने भन्दै कार्यकर्ताले सत्यलाई बन्धकी राख्नाले पार्टी क्षयीकरणको बाटोमा गएको बताए ।
“पार्टीका दाइ–भाउजूले भनिसके, अब मान्नु पर्छ भनेर सत्यलाई बन्धकी राख्ने कार्यकर्ता वा नेता कायर वा दास हुन् । यिनीहरुबाट पार्टी उँभो लाग्दैन,” उनले भने ।
नेता केसीले कांग्रेस आफ्नै आन्तरिक कारणले कमजोर भएको स्पष्ट पारे । अरु पार्टी कमजोर भएको फाइदा उठाएर कांग्रेस बलियो नहुने भन्दै उनले पार्टीको आन्तरिक लोकतन्त्र कमजोर भएकाले पार्टी यस्तो स्थितिमा पुगेको धारणा राखे ।
उनले पछिल्लो समय धार्मिक द्वन्द्व बढ्दै गएको बताउँदै त्यसलाई समयमै सरकारले समाधानको पहल गर्नुपर्नेमा जोड दिए ।
“हामीले बुझ्नु पर्छ, जनप्रियतावादबाटै हिटलर जन्मेका हुन् । तसर्थ, यथार्थ र आदर्शबाट मात्रै देश चल्छ । बहुजातीय, बहुसांस्कृतिक र धार्मिक सहिष्णुता भएको देशमा धार्मिक द्वन्द्वको खतरा बढ्दै छ । त्यसलाई राज्यले समयमै समाधानको पहल लिनुपर्छ,” उनले भने ।
उनले चर्चित भ्रष्टचारका काण्डहरू वाइडबडी, यती, ओम्नीसम्मका काण्ड छानबिन गर्न सरकारले खुट्टा कमाउन नहुने बताए ।
