काठमाडौं । इजरायलको नेतन्यामा आयोजना हुने वल्र्ड अक्वाटिक वल्र्ड जुनियर स्विमिङ च्याम्पियनसिप २०२३–मा सहभागी हुने नेपाली पौडी टोलीलाई बिदाइ गरिएको छ ।
नेपाली टिमलाई आज एक कार्यक्रमका बीच राष्ट्रिय खेलकुद परिषद् (राखेप)का सदस्यसचिव टंकलाल घिसिङले शुभकामनासहित बिदाइ गरेका हुन् ।
टोलीलाई बिदाइ गर्दै सदस्य सचिव घिसिङले खेलाडीले पुरानो इतिहासलाई हेरेर रमाउने नभइ आफैँले नयाँ इतिहास कोर्नुपर्ने बताए । घिसिङले खेलाडीहरूका लागि सहज वातावरण सृजना गर्न आफू हरसमय लागि परेको बताए ।
यहि भदौ १८ देखि २३ गतेसम्म आयोजना हुने च्याम्पियनसिपमा सहभागी हुन जाने टोलीको व्यवस्थापकमा जेनीफर लामा र प्रशिक्षकमा पौडीका प्रमुख प्रशिक्षक शंकर कार्की छन् ।
प्रतियोगितामा सहभागिता जनाउने खेलाडीहरूमा अजलकाजी ताम्राकार (५० मिटर बटरफलाई र फ्रिस्टायल), इरभिन श्रेष्ठ (१०० र २०० मिटर फ्रिस्टायल), अल्भिन महर्जन (५० मिटर बटरफलाई र १०० मिटर फ्रिस्टायल), उपास्ती महर्जन (५० र १०० मिटर ब्रेष्टस्ट्रोक), रोशा न्यौपाने (५० र १०० मिटर फ्रिस्टायल) र टिशा महर्जन (५० मिटर ब्याकस्ट्रोक र १०० मिटर फ्रिस्टायल) छन् ।
बिदाइ कार्यक्रममा संघका अध्यक्ष अशोक बज्राचार्य लगायतको उपस्थिति थियो । नेपाली टोली भोलि बिहान ७ बजे इजरायलतर्फ प्रस्थान गर्ने कार्यक्रम रहेको छ ।
