काठमाडौं । ललितानिवास जग्गा प्रकरणमा जिल्ला सरकारी वकिल कार्यालय काठमाडौंले पूर्वनिर्वाचन आयुक्त सुधीरकुमार शाहलाई प्रतिवादीको सूचीबाट हटाएर मुद्दा दायर गरेको छ ।

नेपाली प्रहरीको केन्द्रीय अनुसन्धान ब्युरो (सीआईबी)ले उनलाई प्रतिवादी बनाउन सिफारिस गरेको थियो । तर, शाहलाई प्रतिवादीको सूचीबाट हटाएर मुद्दा चलाइएको जिल्ला सरकारी वकिल कार्यालय काठमाडौंका प्रवक्ता महेश खत्रीले जानकारी दिए ।

खत्रीले बाह्रखरीसँग भने, “सुधीरकुमार शाहको कतै पनि हस्ताक्षर भेटिएन, त्यसकारण उहाँलाई मुद्दा चलाउन प्रमाण नपुगेको ठहर गर्दै प्रतिवादीबाट हटाइएको हो ।”

सो प्रकरणमा जोडिएका पूर्वप्रधानमन्त्रीद्वय माधवकुमार नेपाल र डा. बाबुराम भट्टराईलाई भने प्रहरीले प्रतिवादी नै नबनाई प्रतिवेदन बुझाएको थियो । उनीहरूसँगै तत्कालीन मुख्यसचिव लीलामणि पौडेललाई पनि प्रतिवादी बनाइएको छैन ।

“पूर्वप्रधानमन्त्रीहरू नेपाल र भट्टराई अनि पूर्वमुख्यसचिव पौडेललाई त प्रहरीले नै प्रतिवादी बनाएको छैन,” खत्रीले भने, “प्रहरीले प्रतिवादी बनाएर हाम्रोबाट हटाइएको नामचाहिँ शाहको मात्र हो ।”

पूर्वनिर्वाचन आयुक्त शाह ललितानिवास जग्गा प्रकरणमा पक्राउ परेका थिए । उनलाई ६२ दिन हिरासतमा राखेर अनुसन्धान गरी प्रहरीले प्रतिवादी बनाएर सरकारी वकिलमा प्रतिवेदन बुझाएको थियो ।

अनुसन्धानका क्रममा उनले मालपोत कार्यालय भक्तपुरको प्रमुख भएको समयमा श्रीमती उर्मिला शाहको नाममा ११ आना दुई पैसा जग्गा लिएको देखिएको थियो । सुधीरपत्नी उर्मिला र गेहनाथ चापागाईंपत्नी भुवनकुमारीका नाममा कित्ता नम्बर–३६ को एक रोपनी दुई पैसा जग्गा संयुक्त रूपमा नै भेटिएको प्रहरीको प्रतिवेदनमा उल्लेख छ । सीआईबीले शाहविरुद्ध २९ करोड ३२ लाख रुपैयाँ माग दाबीसहित मुद्दा चलाउन राय दिएको थियो ।