काठमडौं । प्रस्तावित प्रधानन्यायाधीश विश्वम्भप्रसाद श्रेष्ठको संसदीय सुनुवाइ जारी छ ।
सोमबार संसदीय सुनुवाइमा प्रधानन्यायाधीश श्रेष्ठलाई सांसदहरूले विभिन्न प्रश्न सोधेका छन् । उनीहरूले न्यायपालिकाको सुधार योजना र श्रेष्ठमाथि लागेका व्यक्तिगत आरोपका विषयमा प्रश्न गरेका छन् ।
“यो देशमा भएको भ्रष्टाचार, अनियमितता न्यायालबाट सुधार गर्ने जनताको माग छ, यसमा तपाईंको धारण के छ ?,” राष्ट्रिय स्वतन्त्र पार्टी (रास्वपा)का सांसद डीपी अर्यालले सोधेका छन्, “क्यापिटल मर्चेन्ट फाइनान्स र राजन विष्टको नाम किटेर आएको छ, यसमा पनि स्पष्ट पारिदिनुहोला ।”
अर्यालले ‘फास्ट ट्रयाक’बाट न्याय दिने विषयमा आफ्नो कार्ययोजना राख्न भन्दै ‘चेन अफ कमान्ड’को अध्ययन कसरी गर्नुहुन्छ ? भनी प्रश्न गरे ।
नेकपा (एमाले)का सांसद देवेन्द्र दाहालले अदालतमा पुराना मुद्दाहरूका चाङ कहिले घट्छ ? भन्दै प्रश्न गरे ।
“सर्वोच्च अदालत र सबै अदालतका पुराना मुद्दा पूरै फर्छ्योट गर्ने ठोस योजना के छ ?,” राष्ट्रियसभामा एमाले संसदीय दलका नेता समेत रहेका दाहालले प्रश्न गरे, “प्रहरी प्रयोग गरी राज्यसत्ताका प्रमुखहरूले नै कानुन र फैसला मान्दैनन्, यसमा के छ योजना ?”
यस्तै, एमालेका सांसद महेश बर्तौलाले न्याय किन महँगो भएको र नागरिकले न्यायालय जान नसक्ने अवस्था कसरी आयो ? भनी प्रश्न गरे ।
“धेरै मानिस न्याय महँगो भयो, न्यायालयमा आउन सकेनन्, कसको कारणले महँगो भयो, बार कि बेन्चले ?,” बर्तौलाले प्रश्न गरे, “यसलाई कसरी समाधान गर्नुहुन्छ ?”
उनले न्यायालयमा न्यायाधीश नियुक्ति किन भएन ? किन न्यायाधीशको पूर्णता भएन ? बेथितिको सिकार को हो ? भनेर पनि प्रश्न गरेका थिए ।
“न्यायालयप्रति नागरिकको भरोसा मरेको छ, न्याय खरिद–बिक्री हुन्छ भन्ने छ, यसलाई कसरी लिनुहुन्छ ?,” बतौलाले थप प्रश्न गरे, “पैसा नभएको कारणले न्यायालयको ढोकामा आउन नसकेकाहरूको बारेमा के सोच्नुभएको छ ?”
नेपाली कांग्रेसका संसद रमेशजंग रायमाझीले न्यायलयमा भित्रिएका विकृति–विसंगतिको जिम्मेवारी कसले लिने ? भन्दै प्रश्न गरे । उनले बाहिरका सम्बन्धका आफन्तहरूले अदालतमा किन सहज पहुँच पाउँछन् ? भन्ने विषयमा पनि प्रश्न गरे ।
“न्यायालयमा विकृति आयो भन्ने सुनिन्छ, त्यसको जिम्मेवार को हो ? राजनीतिक दल, न्यायालय, न्यायाधीश वा मुद्दा हाल्ने जनता ? को हो दोषी ?,” राष्ट्रियसभामा कांग्रेस संसदीय दलका नेता समेत रहेका रायमाझीले प्रश्न गरे, “सधैँ बिचौलियाको कुरा उठ्छ, को हो त्यो बिचौलिया ? न्यायाधीश बाहिर कोही कसको आफन्त होला, तर किन अदालतमा उनीहरूलाइ इन्ट्री हुन्छ ? किन कारबाही हुँदैन ?”
उनले प्रधानन्यायाधीशका रूपमा १३ महिनाको कार्यकालमा पुराना मुद्दा फैसला गर्न सकिन्छ कि सकिँदैन ? भन्दै थप प्रश्न गरेका थिए । उनले रेशम चौधरीको मुद्दामा अपराधी हो भनेर आएको भन्दै अब फेरि थुन्न मिल्छ कि मिल्दैन ? भनेर प्रश्न गरेका थिए ।
“राष्ट्रपतिबाट आममाफी पाएपछि सर्वोच्चको फैसलाको पूर्णपाठमा रेशम चौधरी अपराधी हो भनेर आयो । रेशम चौधरीलाई थुन्न मिल्छ कि मिल्दैन ?,” रायमाझीले प्रश्न गरे, “अब उजुरी लिएर सरोकारवाला सर्वोच्च जान पाउँछ कि पाउँदैन ?”
