![प्रदेश सरकार सर्वोच्च अदालत र शीर्ष नेताकोमा मात्र भेटिएको छ : पूर्वमन्त्री कार्की](https://12khari.top/uploads/posts/karki1692353345.jpg)
विराटनगर । नेपाली कांग्रेस कोसी प्रदेशका सांसद तथा पूर्वमन्त्री केदार कार्कीले प्रदेश सरकार सर्वोच्च अदालत र काठमाडौंमा मात्र भेटिने गरेको आरोप लगाएका छन् ।
कोसी प्रदेशसभाको शुक्रबारको बैठकको विशेष समयमा बोल्दै कार्कीले डेंगी, लम्पीस्किन तथा राजनीतिक परिस्थिति जटिल बनेको अवस्थामा प्रदेश सरकारको उपस्थिति जनताले देख्न नपाएको बताए ।
उनले भने, “सरकारको उपस्थिति सर्वोच्च अदालतमा छ । केन्द्रीय नेताकोमा छ । संसदहरूलाई बदनाम गराउन चुल्हो वितरणको काम हुन्छ । सभालाई समेत नियमित चलाउन सकिएको छैन । संसद् नै नबसेपछि सरकार छाडा भइहाल्छ नी । प्रदेश बजेट होलिडेको अवस्थामा जाने अवस्थामा पुगिसकेको छ ।”
कार्कीले प्रदेश र जनताप्रति उत्तरदायी नभए थप निरासा बढ्छ भन्दै प्रदेशको सार्वभौम अधिकार प्राप्त भएकोले माथिमात्र हेर्न नहुने सुझाव दिए ।
कार्कीले कोसी प्रदेशका जनतामात्र नभएर अहिले पशु चौपायासमेत संकटमा परेको बताए । अहिले लम्पीस्किन संक्रमणका कारण धेरै किसानहरू सरकारलाई खोजिरहेको बताउँदै उनले भने, “उपचार होला कि भनेर किसान सरकारका खोजेर बसेको छ ।” डेंगी संक्रमण धेरै बढिसकेको तर सरकार भने कुर्सी बचाउने खेलमा मात्र लागेको बताए ।
‘डेंगी लागेकाहरूलाई उपचार गर्न, अस्पतालका बेड थप्नको लागि के काम भएको छ ?’ सदनमा प्रश्न गर्दै कार्कीले दलहरुरू मिलेर समस्या समाधान गर्नुपर्ने बताए ।