काठमाडौं । नेपाल धितोपत्र बोर्डले थप पाँच कम्पनीलाई नयाँ ब्रोकर लाइसेन्स दिएको छ । बिहीबार बसेको बोर्ड सञ्चालक समितिको बैठकबाट ती कम्पनीलाई नयाँ ब्रोकर लाइसेन्स दिने निर्णय गरिएको हो ।

सजिलो ब्रोकर, रोडसो सेक्युरिटिज, बेनी सेक्युरिटिज, हिमालयन सेक्युरिटिज र सनी सेक्युरिटिजले ब्रोकर लाइसेन्स पाएका हुन् । यी समेत गरी अहिलेसम्म ३७ कम्पनीले ब्रोकर लाइसेन्स प्राप्त गरेका छन् ।

सजिलो ब्रोकरको कार्यालय ललितपुरमा रहनेछ । रोडसो सेक्युरिटिजको काठमाडौंको सुन्धारा, बेनी सेक्युरिटिजको बानेश्वर, हिमालयन सेक्युरिटिजको सुन्धारा र सनी सेक्युरिटिजको कार्यालय नक्सालमा रहनेछ ।

आवश्यक पूर्वाधार तयार गरेका कम्पनीलाई लाइसेन्स दिइएको बोर्डका कार्यकारी निर्देशक एवं प्रवक्ता मुक्तिनाथ श्रेष्ठले जानकारी दिए ।

लाइसेन्सका लागि निवेदन दिएका थप ६ कम्पनीसित आवश्यक सूचना मागिएको उनले बताए । यी कम्पनीलाई पनि केही समयमै लाइसेन्स दिइने उनले जानकारी दिए ।

पहिलो चरणमा लाइसेन्स पाएका सात ब्रोकर कम्पनीले हाल कारोबार सुरु गरिसकेका छन् ।