काठमाडौं । नक्कली भुटानी शरणार्थी प्रकरणमा प्रहरीले फेरि अनुसन्धान गर्नुपर्ने देखिएको छ । नक्कली भुटानी शरणार्थी बनाएर अमेरिका लैजाने भन्दै ठगी गर्ने गिरोहविरुद्ध थप १८ जनाले उजुरी दिएपछि प्रहरीमाथि फेरि अनुसन्धान गर्न दबाब परेको हो ।
यसअघि प्रहरीले गरेको पहिलो चरणको अनुसन्धानका आधारमा पूर्वगृहमन्त्री बालकृष्ण खाँण, सांसद टोपबहादुर रायमाझी, सचिव तथा पूर्वगृहसचिव टेकनारायण पाण्डेसहित ३० जनाविरुद्ध मुद्दा दायर गरेको थियो ।
सोही मुद्दामा हाल १८ जना पुर्पक्षका लागि जेल चलान भएका छन् । १० जना अझै फरार छन् । उनीहरूविरुद्ध थप १८ जनाले ठगी गरेको भन्दै प्रहरीमा उजुरी दिएका हुन् । यसअघि ११३ जनाको उजुरी परेको थियो ।
आज १८ जनाले उजुरी दिएसँगै कुल उजुरीकर्ताको संख्या १३१ पुगेको छ ।
सोमबार उजुरी दिएकाहरूलेसमेत यसअघि नै पक्राउ परेका सानु भण्डारी, केशव दुलालले आफूलाई ठगी गरेको किटानीसहितको उजुरी दिएका छन् । भण्डारी र दुलालसमेत हाल थुनामै छन् ।
