काठमाडौं । सन् २०११ को च्याम्पियन जापानविरुद्ध २–१ को जित निकाल्दै स्विडेन फिफा महिला विश्वकपको सेमिफाइनलमा प्रवेश गरेको छ । जापान बाहिरिएसँगै विश्वकपको नवौँ संस्करणले नयाँ विजेता पाउने निश्चित भएको छ ।

यसअघि दुईपटकको विश्वकप विजेता जर्मनी समूह चरणबाटै, अमेरिका र नर्वे प्रिक्वार्टरफाइनलबाट बाहिरिँदा जापानको यात्रा पनि क्वार्टरफाइनलसम्म सीमित बनेको हो ।

शुक्रबार न्युजिल्यान्डको अकल्यान्डस्थित इडेन पार्कमा भएको खेलमा स्विडेनलाई जित दिलाउन अमान्डा लेस्टेड्ट र फिलिपा एन्जेलडालले गोल गरे । जापानकी होनाका हायासीले गोल फर्काए पनि टिमको हार टार्न भने सकिनन् । 

३२औँ मिनेटमा अमान्डाले गरेको गोलबाट स्विडेनले अग्रता बनाएको थियो । यही गोलको मदतलमा जापानविरुद्ध स्विडेनले पहिलो हाफमा १–० को अग्रता कायम राखेको थियो । यस्तै, ५१औँ मिनेटमा एन्जेलडालले पेनाल्टीमार्फत गोल गर्दै स्विडेनको अग्रतालाई दोब्बर बनाएकी थिइन् ।

दोस्रो हाफमा आक्रामक बनेको जापानले ८७औँ मिनेटमा हायासीको गोलबाट खेलमा फर्किने सम्भावनालाई कायम राखेको थियो । तर, यसपछि दुवै टिमबाट गोल हुन नसक्दा स्विडेनले रोमाञ्चक जित निकाल्दै अन्तिम–४ मा स्थान निश्चित गर्‍यो ।

खेलको ७६औँ मिनेटमा प्राप्त पेनाल्टीलाई सदुपयोग गर्न नसक्नु नै जापानका लागि दुर्भाग्य बन्यो । पेनाल्टी प्रहारका लागि आएकी रिको युकीले गरेको प्रहार क्रसबारमा लागेर फर्किएपछि जापानले गोलको सुनौलो मौका गुमाएको थियो ।

जितसँगै स्विडेनले फाइनल प्रवेशका लागि स्पेनसँगको भेट पक्का गरेको छ । स्पेनले पनि आजै भएको पहिलो क्वार्टरफाइनलमा साविक उपविजेता नेदरल्यान्ड्सको चुनौती २–१ ले पन्छाउँदै सेमिफाइनको यात्रा तय गरेको थियो ।

विश्वकपमा स्विडेनको इतिहास

महिला विश्वकपमा स्विडेन पुरुष फुटबलमा नेदरल्यान्ड्सजस्तै ‘अभागी’ टिम हो । १९९१ देखि विश्वकपका सबै संस्करण खेलेको स्विडेनले हालसम्म उपाधि चुम्न सकेको छैन । एकपटक उपविजेता र तीनपटक तेस्रो भएको थियो । स्विडेन गत संस्करणमा पनि तेस्रो भएको थियो ।

स्विडेन जारी संस्करणमा समूह ‘जी’को विजेता बन्दै नकआउट चरणमा प्रवेश गरेको थियो । स्विडेनले प्रिक्वार्टरफाइनलमा साविक विजेता समेत रहेको अमेरिकालाई पेनाल्टी सुटआउटमा ५–४ ले स्तब्ध बनाएको थियो । २००३ को उपविजेता स्विडेनले १९९१, २०११ र २०१९ मा तेस्रो स्थान हासिल गरेको थियो ।