काठमाडौं । काठमाडौंको कालोपुलस्थित खानेपानी वितरणको मुख्य पाइप अड्याइएको पिल्लर जोखिममा परेको छ । धोबीखोलामाथिको पुलछेउको खानेपानीको पाइप अड्याइएको पिल्लर भाँचिने अवस्थामा पुगेको हो ।
उक्त पिल्लर भाँचिएको अवस्थामा पाइपलाइनमा समेत असर गर्न सक्छ । पाइपलाइन धेरै पुरानो रहेको र त्यसबाट काठमाडौंका विभिन्न स्थानमा पानी वितरण भइरहेको काठमाडौं उपत्यका खानेपानी लिमिटेड (केयूकेएल)ले जनाएको छ ।
सोमबार रातिदेखि अविरल वर्षासँगै खोलामा बाढी आउँदा पिल्लर भाँचिने अवस्थामा पुगेको हो । पिल्लरको वस्तुस्थितिबारे जानकारी लिने कार्य भइसकेको केयूकेएलका प्रवक्ता प्रकाशकुमार राईले बताए ।
पाइप अड्याउन खोलामा पानीको बहाव कम भएपछि अर्को संरचना बनाइने उनले जानकारी दिए ।
“हाम्रो टोली पुगेर हेरिसकेको छ । खोलामा पानी कम भएपछि अर्को संरचना बनाउँछौँ,” उनले बाह्रखरीसित भने, “अहिलेलाई पाइप अडिएको नै छ ।”
उनका अनुसार उक्त पाइपलाइनबाट महाँकालदेखि कालोपुल, नक्साल हुँदै केशरमहल क्षेत्रसम्म पानी वितरण गरिँदै आएको छ ।
थप तस्बिर हेर्नोस्–
