काठमाडौं । पछिल्लो दुई संस्करणको विजेता अमेरिकालाई सडन डेथमा स्तब्ध बनाउँदै स्विडेन फिफा महिला विश्वकपको अन्तिम–आठमा प्रवेश गरेको छ ।

आइतबार अस्ट्रेलियाको मेलबर्नस्थित मेलबर्न रेक्टेङ्गुलर रंगशालामा सम्पन्न खेलको निर्धारित र अतिरिक्त समयमा दुवै टिमले गोलरहित बराबरी खेलेपछि खेलको निर्णय पेनाल्टी सुटआउटबाट भएको हो । सडन डेथमा स्विडेनले अमेरिकालाई ५–४ ले स्तब्ध बनाउँदै क्वार्टरफाइनलमा स्थान पक्का गरेको हो ।

पेनाल्टीमा स्विडेनकी प्रिडोलिना रोल्फो, एलिन रुबेनसन हाना बेनिसन, माग्डालिना एरिकसन र लिना हर्टिगले गोल गरिन् । स्विडेनकी जी जोर्न र रेबेका ब्लोमक्विभिस्टले भने पेनाल्टी चुकाएका थिए । स्विडेनकी जोर्नको प्रहार आकासिदा ब्लोमक्विभिस्टको प्रहार अमेरिकाकी गोलकिपर एलिसा नाहेरले बचाएकी थिइन् ।

अमेरिकाकी एन्डी सुलिभान, लिन्ड्सी मोरान, क्रिस्टिइ भेविस र एलिसा नाहेरले पेनाल्टीमा गोल गरेका थिए । मेगन रापिनोए, सोफिया स्मिथ र के ओ हाराले भने पेनाल्टी सदुपयोग गर्न सकेनन् ।

सडन डेथमा ४–४ को बराबरी अवस्थामा पेनाल्टी प्रहारका लागि आएकी हाराको प्रहार पोस्टमा लागेर फर्किएपछि स्विडेनले जितको मौका बनाएको थियो । त्यसपछि प्रहारका लागि आएकी लिना हर्टिगको प्रहार अमेरिकी गोलकिपर नाहेरले बचाउन खोजे पनि बलले गोललाइन पार गरेपछि स्विडेनले प्रतियोगिताकै सर्वाधिक सफल टिमविरुद्ध सनसनीपूर्ण जित निश्चित गर्यो ।

अमेरिकाले विश्वकपको आठ संस्करण समाप्त हुँदा चार संस्करणको उपाधि जितेको छ । अमेरिकाले सन् २०१५ र २०१९ गरी लगातार पछिल्लो दुई संस्करणको उपाधि जितेको थियो ।

स्विडेनले अब सेमिफाइनल प्रवेशका लागि सन् २०११ को विजेता जापानविरुद्ध खेल्नेछ । जापानले शनिबार भएको प्रि–क्वार्टरफाइनलमा नर्वेलाई ३–१ ले हराउँदै अन्तिम– आठको यात्रा तय गरेको थियो ।