विराटनगर । सामाजिक सञ्जालमा विज्ञापन गरी आर्कषक तलब सुविधा दिने प्रलोभन देखाउने जब सेन्टरहरुमा इटहरी उपमहानगरपालिकाले अनुगमन गरेको छ । सहजै मासिक ५० देखि ६० हजार कमाइ हुने भन्दै फेसबुकमा विज्ञापन गर्ने जब सेन्टरमा इटहरीका मेयर हेमकर्ण पौडेल नेतृत्वको टोलीले अनुगमन गरेको हो ।

पछिल्लो समय ठगीका नयाँ–नयाँ शैली देखापरेको र सर्वसाधारण ठगीमा पर्न सक्ने देखिएकोले त्यस्ता कार्यालयमा अनुगमन गरिएको मेयर पौडेलले जानकारी दिए ।

“केही दिनदेखि सामाजिक सञ्जालमा ६० हजारसम्म तलब दिने भन्दै विज्ञापन आइरहेको मैले पनि देखेको थिएँ त्यसको वास्तविकता बुझ्न अनुगमन गरिएको हो,” पौडेलले भने । विभिन्न सामान बेच्नका झुटा विवरण राखी झुटो विज्ञापन गरेको पाइएको पौडेलले बताए ।

सुनसरीमा जब सेन्टरहरुले विभिन्न सामाजिक सञ्जाल तथा टिकटकमा पनि अडियो, भिडियो तथा टेक्स्टमै आकर्षक विज्ञापन बजाउने र ठगी गर्न सक्ने भन्दै सर्तकता अपनाउन मेयर पौडेलले आग्रह गरेका छन् ।

यस्ता कम्पनीले ठूलो भवनमा कार्यालय खोलेर काम गर्ने र कमिसनको लागि कर्मचारीहरुले विज्ञापन गरेको स्वीकार गर्दै आगामी दिनमा यस्तो नगर्ने प्रतिवद्धता जनाएका छन् । छलफलका लागि उपमहानगरमा आउन उनीहरुलाई निर्देशन दिइएको पौडेलको भनाइ छ ।

विशेष गरी पूर्वी पहाडी जिल्लाहरुबाट पढ्न आएका युवा युवतीलाई लक्षित गरेर विज्ञापन गरेको भन्दै उपमहानगरका मेयरसहितको टोलीले अनुगमन गरेको हो ।

इलाका प्रहरी कार्यालय इटहरीका डीएसपी माधव काफ्लेले सामाजिक सञ्जालमा यसरी विज्ञापन गर्न नहुने र सर्वसाधारणलाई झुक्याउने काम गलत भएको बताए । उनले भने, “यस्ता विज्ञापन नरोके कारबाही अघि बढाउँछौँ ।”