काठमाडौं ।  उद्योग वाणिज्य तथा आपूर्तिमन्त्री रमेश रिजालले खाद्य पदार्थको मूल्यवृद्धि नहुने गरी मुलुकको आपूर्ति व्यवस्था सहज बनाउन निर्देशन दिएका छन् ।

बुधबार मन्त्रालयमा भएको मुलुकको आपूर्ति व्यवस्थाको समीक्षासहित सहज र नियमित बनाउनेसम्बन्धी छलफल कार्यक्रममा मन्त्री रिजालले यस्तो निर्देशन दिएका हुन् ।

आपूर्ति व्यवस्थामा आउनसक्ने समस्या समाधान गर्न आफ्नो पूर्ण साथ र सहयोग रहने मन्त्री रिजालले स्पष्ट पारे। आपूर्तिसँग सम्बद्ध सम्पूर्ण सरोकारवाला निकायहरू सजग रही कुनै कमीकमजोरी हुन नदिन सबैले आ–आफ्नो तर्फबाट भूमिका निर्वाह गर्न निर्देशन दिए ।

मन्त्रालयको तर्फबाट अत्यावश्यक वस्तुहरूको आपूर्तिमा सबै प्रकारको सहजीकरण गरिने प्रतिबद्धता समेत व्यक्त गरे ।

कार्यक्रममा उद्योग, वाणिज्य तथा आपूर्ति मन्त्रालयका सचिव मधुकुमार मरासिनीले सबै सरकारी तथा निजी क्षेत्रले आपसी सहकार्यमा आपूर्ति व्यवस्था सहज र व्यवस्थित बनाउन लाग्नुपर्ने बताए ।