काठमाडौं । समूह चरणको आफ्नो अन्तिम खेलमा अर्जेन्टिनाविरुद्ध २–० को जित निकाल्दै स्वीडेन फिफा महिला विश्वकपको प्रि–क्वार्टरफाइनलमा प्रवेश गरेको छ । यो सँगै अर्जेन्टिनाले विश्वकपको यो संस्करण पनि जितविहीन टुंग्याएको छ ।

सन् २००२ को संस्करणदेखि विश्वकप खेल्दै आए पनि अर्जेन्टिनाले हालसम्म कुनै पनि संस्करणमा जित निकाल्न सकेको छैन ।

बुधबार स्वीडेनको जितमा रेबेका ब्लोमक्युभिस्ट र एलिन रुबेनसनले समान एक गोल गरे । पहिलो हाफमा गोलरहित बराबरीमा रोकिए पनि स्वीडेनले ६६औं मिनेटमा ब्लोमक्युभिस्टले गरेको गोलमा अग्रता बनाएको थियो ।

इन्जुरी समयमा रुबेनसनले गोल गर्दै स्वीडेनको अग्रता दोब्बर पारिन् । यसपछि दुवै टिमबाट गोल हुन नसक्दा स्वीडेनले २–० को जितसहित समूह ‘जी’ को विजेताको रुपमा प्रि–क्वार्टरफाइनलको यात्रा तय गर्यो ।

समूह विजेता बनेको स्वीडेनले तीन खेलबाट नौ अंक जोड्यो । समान खेल खेले पनि पुछारमा रहेको अर्जेन्टिनाले भने एक अंकमात्र जोड्न सक्यो ।

बुधबार भएको समूह ‘जी’ कै अर्को खेलमा इटालीविरुद्ध ३–२ को रोमाञ्चक जित निकाल्दै दक्षिण अफ्रिकाले पनि अन्तिम–१६ को यात्रा निश्चित गर्यो ।

दक्षिण अफ्रिकाको जितमा हिल्दाह मगाइया र थेम्बी गात्लानाले समान एक गोल गरे । दक्षिण अफ्रिकाले एक गोल भने इटालीबाट आत्मघाति उपहार पाएको थियो । इटालीकी एरियाना कारुसोले दुई गोल गरे पनि टिमको हार टार्न सकिनन् । तीन खेलबाट तीन अंक जोडे पनि इटालीले अन्तिम–१६ मा स्थान बनाउन सकेन ।

जितसँगै चार अंकसहित समूह ‘जी’ को उपविजेता बनेको दक्षिण अफ्रिकाले भने अब क्वार्टरफाइनल प्रवेशका लागि साविक उपविजेता नेदरल्यान्ड्सको सामना गर्नेछ । यस्तै, समूह विजेता बनेको स्वीडेनले भने अन्तिम–८ मा प्रवेशका लागि साविक विजेता अमेरिकाविरुद्ध खेल्नेछ ।