सिडनी, अस्ट्रेलिया । गैरआवासीय नेपाली संघ (एनआरएन) अस्ट्रेलियाको भोलि शनिबार हुने निर्वाचनलाई लिएर कानुन, न्याय तथा संसदीय व्यवस्था मन्त्री धनराज गुरुङको प्रतिक्रियाले चर्को विवाद सिर्जना गरेको छ । 

सत्तारुढ नेपाली कांग्रेसका उपसभापति समेत रहेका गुरुङले शुक्रबार डेमोक्रयाट्हरुको भेलालाई जुममार्फत् सम्बोधन गर्ने क्रममा पार्टीको आधिकारिक उमेदवार भन्दै डिला खरेलको नाम घोषणा गरेपछि कांग्रेस समर्थक एनआरएनहरु रुष्ट बनेका हुन् । 

निर्वाचनमा खरेल र अनिल पोखरेल डेमोक्र्याट तथा प्रगतिशील समूहको प्रतिनिधित्व गर्दै देव गुरुङले प्यानलसहित अध्यक्षमा उमेदवारी दिएका छन् । 

डेमोक्रयाटहरु नै दुई समूहमा विभाजित भएर चुनावमा उत्रिएका बेला मन्त्री गुरुङको प्रतिक्रियाले एनआरएन अभियान नै विवादमा फसेको अस्ट्रेलियामा बसोबास गर्ने नेपाली सामाजिक अगुवाहरुले बताएका छन् । 

कांग्रेस समर्थित डेमोक्र्याटहरुबाटै दुई प्यानलको उमेदवारी परेपछि विवाद समाधानार्थ नेपाली कांग्रेस जनसम्पर्क समिति, अस्ट्रेलियाको जुम बैठकमा मन्त्री गुरुङले पोखरेललाई उमेदवारी फिर्ता लिन दबाब दिएको सहभागीहरुले बताएका छन् । 

बैठकका सहभागीहरुका अनुसार मन्त्री गुरुङले ‘पोखरेललाई उमेदवारी फिर्ता लिई आधिकारिक उमेदवार खरेल र उनको टिमलाई सघाउन’ निर्देशन दिएका थिए । 

“पहिला नै सबै पक्ष बसेर छलफलबाट निर्णय भइसकेको थियो । डिला खरेलजी पार्टीको आधिकारिक उमेदवार हो । उहाँलाई जिताउन सबै डेमोक्र्याटहरु एकजुट भएर लाग्नुस्,” मन्त्री गुरुङलाई उद्धृत गर्दै एक सहभागीले बताए । 

एक दशकभन्दा लामो समयदेखि सिड्नीमा बसेर पत्रकारिता गर्दै आएका वरिष्ठ पत्रकार हेमन्तराज काफ्लेले एनआरएन अभियानमा मन्त्री गुरुङको हस्तक्षेप आपत्तिजनक रहेको बताए । 

“एनआरएन भनेको देशको विकास र समृद्धिमा सघाउने र विभिन्न देशमा बसेर जीविकोपार्जन गरिरहेका नेपालीहरुको हकहित संवद्र्धनमा काम गर्ने विशुद्ध सामाजिक संस्था हो,” काफ्लेले भने, “मन्त्री गुरुङको यो हर्कतले विदेशमा पनि नेपालीलाई पार्टी र गुटका नाममा थप विभाजित गर्ने दुश्प्रयासमा मलजल गरेको छ ।”

मन्त्री खरेलबाट आधिकारिक उमेदवारको हैसियत पाएका खरेलले भने गुरुङले शुभकामना मात्र दिएको बताए । 

भने, “एनआरएनमा नेपालका कुनै पनि पार्टीको कुनै प्रत्यक्ष सम्बन्ध हुँदैन । एनआरएनले नेपालमा सम्बन्ध राख्ने भनेको परराष्ट्र र कानुन मन्त्रालयसँग हो । कानुन मन्त्री भएको नाताले मन्त्रीज्युले जुम मिटिङमा सामान्य ढंगमा शुभकामना दिनुभएको हो । यसलाई आधिकारिक भन्ने कि नभन्ने भन्ने आ–आफ्नो बुझाइको कुरा हो । मेरो बुझाइमा यो शुभकामना मात्र हो ।”

अध्यक्ष पदका अर्का डेमोक्रयाट उमेदवार पोखरेलले आफू चुनावमा मात्र केन्द्रित रहेको बताउँदै त्यस्ता विवादित विषयमा ध्यान दिन नभ्याएको प्रतिक्रिया दिए ।