काठमाडौं । समाजवादी मोर्चाको बैठक रोकिएको छ । प्रधानमन्त्री पुष्पकमल दाहाल प्रचण्डपत्नी सीता दाहालको निधनपछि बैठक रोकिएको हो । 

नेकपा (एकीकृत समाजवादी)का उपाध्यक्ष प्रमेश हमालले मोर्चाको बैठक रोकिएको पुष्टि गरे । समसामयिक राजनीतिक विषयमा छलफल गर्न एकीकृत समाजवादीको केन्द्रीय कार्यालय आलोकनगरमा आज दिउँसो ४ बजे बैठक बस्ने तय भएको थियो । 

बैठक मोर्चाले सातै प्रदेशमा गर्न लागेको कार्यक्रमको तयारीका विषयमा छलफल हुने बताइएको थियो । साउन पहिलो सातादेखि सातवटै प्रदेशमा मोर्चाको औचित्यबारे जानकारी गराउने कार्यक्रम रहेको छ ।

मोर्चामा नेकपा (माओवादी केन्द्र), जनता समाजवादी पार्टी, एकीकृत समाजवादी र नेत्रविक्रम चन्द नेतृत्वको नेपाल कम्युनिस्ट पार्टी छन् ।