काठमाडौं ।  रुस र क्रिमियालाई जोड्ने पुलमा गत अक्टोबरमा भएको विस्फोटमा युक्रेनकै संलग्नता रहेको देखिएको छ । युक्रेनकी उपरक्षामन्त्री हन्ना मलियारले पुल विस्फोटको घटनालाई आफ्नो उपलब्धिका रूपमा व्याख्या गरेकी छन् ।

५०० दिनअघि रुसले सुरु गरेको आक्रमणपछिका १२ युक्रेनी उपलब्धि भन्दै उनले टेलिग्राममा सूची सार्वजनिक गरेकी छन् । “२७३ दिनअघि हामीले रुसी आपूर्ति रोक्न क्रिमियाको पुलमा पहिलो विस्फोट गर्‍यौँ,” भनेर उनले टेलिग्राममा लेखेको सीएनएनले उल्लेख गरेको छ ।

यस्तै, ४५१ दिनअघि डुबेको रुसी नौसेनाको निर्देशित मिसाइल क्रुजर मोस्कभा र ३७३ दिनअघि स्नेक आइल्यान्डलाई आफ्नो नियन्त्रणमा लिएको कुरालाई पनि उनले उक्त सूचीमा राखेकी छन् ।

रुसी मुख्यभूमि र क्रिमिया प्रायद्वीपबीचको प्रमुख मार्गमा रहेको केर्च पुलमा भएको आक्रमणले रुसी ढुवानीलाई कमजोर पारेको थियो भने युक्रेनका लागि एक किसिमको जितको चर्चा बनेको थियो ।

युक्रेनी अधिकारीहरूले त्यतिबेला पुल विस्फोटमा खुसी मनाए पनि स्पष्टरूपमा जिम्मेवारी भने लिएका थिएनन् । अहिले युक्रेनकी उपरक्षामन्त्री मलियारले पुल विस्फोट पछाडि आफ्नै सेनाको हात रेहेको स्वीकार गरेको देखिएको हो ।

सीएनएनबाट ।