काठमाडौं । नेपाल नर्सिङ काउन्सिलले अलब्राइट इन्स्टिच्युटविरुद्ध साइबर ब्युरोमा जाहेरी दिएको छ । प्रश्नपत्र बाहिरिएको घटनामा संलग्न रहेको आरोपमा काउन्सिलले आइतबार ब्युरोमा जाहेरी दिएको काउन्सिलकी अध्यक्ष सरला केसीले जानकारी दिइन् । 

काउन्सिलले शनिबार लिएको नर्सको ३३औँ नाम दर्ता लाइसेन्स परीक्षामा सिद्धार्थ बनस्थली इन्स्टिच्युटमा रहेको केन्द्रबाट प्रश्नपत्र बाहिरिएको थियो । काउन्सिलले भने लिटिल एन्जल्स स्कुल ललितपुर र वाग्मती कलेज काठमाडौं केन्द्रबाट पनि प्रश्नपत्र बाहिरिएको दाबी गरेको छ । 

यसरी भएको थियो प्रश्नपत्र आउट 

नेपाल नर्सिङ काउन्सिलले वार्षिक तालिका अनुसार असार २३ र २५ गते विभिन्न तहको लाइसेन्स परीक्षाको मिति तोकेको थियो । जसअनुसार शनिबार पीसीएल नर्सहरूको लाइसेन्स परीक्षा भएको थियो ।

परीक्षा अवधि बिहान ९ देखि ११ः३० सम्म तोकिएको थियो । बनस्थली केन्द्रमा परीक्षा दिइरहेकामध्ये एक विद्यार्थी एक घण्टापछि शौचालय गएर फर्किने क्रममा ढिलो आएपछि गार्डले चेक गर्दा मोबाइलबाट प्रश्नपत्र आउट भएको पाइएको थियो । 

पोखराको नर्सिङ तयारी कक्षा पढाउने अल ब्राइट इन्स्टिच्युटको म्यासेन्जर ग्रुपमा प्रश्नपत्र पठाइएको र सो म्यासेज केही समयमै चारसय जना भन्दा बढीले ‘सिन’ गरेको पाइएको काउन्सिलकी अध्यक्ष केसीले बताइन् । प्रश्नपत्र आउट गर्ने, उत्तर पठाउनेलगायतका कार्यमा मुख्य भूमिका अलब्राइट इन्स्टिच्युटको नै रहेको काउन्सिलको दाबी छ ।

प्रश्नपत्र आउट गरेको आरोपामा कास्की लेखनाथकी २० वर्षीया समीक्षा थापा, धादिङ त्रिपुरासुन्दरीकी २३ वर्षीया सविना आले र कास्की लेखनाथकै २० वर्षीया भावना गुरुङलाई बालाजु प्रहरी वृत्तले पक्राउ गरेको छ । 

शनिबार पक्राउ परेका उनीहरूलाई अदालतबाट म्याद थप गरी अनुसन्धान अघि बढाइएको काठमाडौं प्रहरी प्रवत्ता एसपी सीताराम रिजालले बताए ।

"अहिलेलाई पक्राउ परेका तीनजनालाई नै म्याद थप गरेर अनुसन्धान अगाडि बढाइएको छ । थप अनुसन्धान उनीहरूको बयानका आधारमा हुने छ," रिजालले बाह्रखरीसित भने । 

यता काउन्सिलले विशेष कारण देखाएर अहिलेलाई परीक्षा नतिजा स्थगित गरिएको सूचना जारी गरेको छ । स्थगित भएको परीक्षा पुन: सञ्चालन गर्ने वा नगर्नेबारे काउन्सिलले कुनै निर्णय गरेको छैन ।