विराटनगर । कोसी प्रदेशका मुख्यमन्त्री उद्धव थापाले मन्त्रिमण्डल विस्तार गरेका छन् । आइतबार नियुक्त तीन मन्त्रीले पद तथा गोपनीयताको शपथ लिएका छन् ।

नेकपा (माओवादी केन्द्र)बाट जीवन आचार्यलाई आर्थिक मामिला तथा योजना मन्त्रालयको जिम्मेवारी दिइएको छ । आचार्य यसअघि नेकपा (एमाले) नेतृत्वको सरकारमा वन तथा पर्यटनमन्त्री थिए ।

माओवादी केन्द्रकै राजेन्द्र कार्की र नेपाली कांग्रेसका प्रदेशसभा सदस्य रामकुमार खत्रीले पनि मन्त्रीको शपथ लिएका छन् । उनीहरूलाई मन्त्रालयको जिम्मेवारी दिइएको छैन ।

थापा गएको बिहीबार मुख्यमन्त्रीमा नियुक्त भएका हुन् । मुख्यमन्त्रीसँगै एकीकृत समाजवादी र कांग्रेसबाट एक/एक मन्त्रीले शपथ लिएका थिए ।