काठमाडौं । ओमानले आईसीसी क्रिकेट विश्वकप छनोटको सुपर सिक्समा दुई पटकको एकदिवसीय विश्वकप विजेता वेस्ट इन्डिजसामु २२२ रनको लक्ष्य प्रस्तुत गरेको छ । 

बुधबार जिम्बाब्वेको राजधानी हरारेस्थित हरारे स्पोर्ट्स क्लबमा जारी खेलमा टस हारेपछि ब्याटिङमा आएको ओमानले निर्धारित ५० ओभरमा नौ विकेट गुमाएर २२१ रनको योगफल खडा गर्‍यो ।

ओमानका लागि नेपाली मुलका सुरज कुमारले अविजित ५३ रन बनाए । सुरजले ६५ बलमा पाँच चौका र एक छक्का प्रहार गरे । सोएब खानले ५० रन थपे । आयान खानले ३०, कश्यप प्रजापतिले ३१ र मुहम्मद नदिमले २० रन जोडे । 

वेस्ट इन्डिजका रोमारियो सेफर्डले तीन विकेट लिए । काइल मयेर्सले दुई र केभिन सिनक्लाइरले एक विकेट लिए । 

पहिलो जितको खोजीमा रहेका दुवै टिमको विश्वकप खेल्ने सम्भावना समाप्त भइसकेको छ । सुपर सिक्समा अंकविहीन वेस्ट इन्डिज पाँचौँ र ओमान पुछारमा छ । सुपर सिक्समा ओमानको यो अन्तिम खेल हो ।

छनोटबाट शीर्ष स्थानमा रहेको श्रीलंकाले भारतमा हुने विश्वकपमा स्थान बनाइसक्दा अर्को एक टिमको टुंगो लाग्न भने बाँकी छ ।

सुपर सिक्समा श्रीलंकासँगै वेस्ट इन्डिज, ओमान, जिम्बाब्वे, स्कटल्यान्ड र नेदरल्यान्ड्स छन् ।