काठमाडौं । सन् २०२३ सुरु भएयता नेपालमा एक हजार २४ जना डेंगी संक्रमण पुष्टि भएको छ । इपिडिमियोलोजी तथा रोग नियन्त्रण महाशाखाको तथ्यांकअनुसार ६ महिनामा सो संख्यामा संक्रमित थपिएका हुन् । डेंगीबाट पछिल्लो ६ महिनामा एकजनाको मृत्यु भएको छ । 

काठमाडौं उपत्यकामा भने जनवरीयता ९३ जना संक्रमित भएको महाशाखाको तथ्यांक छ । काठमाडौंमा ४६, भक्तपुरमा ३५ र ललितपुरमा १२ जनामा डेंगी पुष्टि भएको हो । महाशाखाका किटजन्य रोग शाखा प्रमुख डा. गोकर्ण दाहालका अनुसार दार्चुला, कास्की, धादिङ लगायतका जिल्लामा संक्रमित धेरै भेटिएका छन् । सन् २०२३ मा गत वर्षभन्दा संक्रमित कम हुने आँकलन महाशाखाको छ । 

“पानी परेपछि केही संख्या त थपिन्छ नै गतवर्ष देखिएका सहरहरूमा योवर्ष कम देखिएला भन्ने हाम्रो आँकलन हो,” डा. दाहालले भने ।  गतवर्ष जुलाइदेखि संक्रमितको संख्या उच्च हुँदै गएको थियो । 

गतवर्षजस्तै डेंगीको अवस्था भयावह हुन नदिन आ आफ्नो तहबाट रोकथामका कार्यक्रम सञ्चालन गर्न निर्देशन दिइएको उनले बताए । सन् २०२२ मा हालसम्मकै सबैभन्दा धेरै ५४ हजार ७७४ जनामा डेंगी देखिएको थियो भने संक्रमणका कारण ८८ जनाको मृत्यु भएको थियो । 

यसवर्ष सरकारले डेंगी फैलिन नदिन हरेक शुक्रबार बिहान साढे १० बजे १० मिनेट डेंगीविरुद्धको अभियान चलाउन सबैमा आह्वान गरेको छ ।