काठमाडौं । आईसीसी क्रिकेट विश्वकप छनोटको सुपर सिक्समा श्रीलंकाले नेदरल्यान्ड्सविरुद्ध २१ रनको जित निकालेको छ ।

शुक्रबार जिम्बाब्वेको क्विन्स स्पोर्ट्स क्लब बुलावाओस्थित श्रीलंकाले प्रस्तुत २१४ रनको लक्ष्य पछ्याउने क्रममा नेदरल्यान्ड्सले ४० ओभरमा सबै विकेट गुमाएर १९२ रन मात्र बनाउन सक्यो ।

नेदरल्यान्ड्सका कप्तान स्कट एडवाड्सले ६७ रन बनाए । वेस्ली बरेसीले ५२ र बास डे लिडेले ४१ रन जोडे । यसबाहेक, नेदरल्यान्ड्सका अन्य ब्याटरले दोहोरो अंकमा रन जोड्न सकेनन् ।

श्रीलंकाका महिसा थिक्षणाले तीन विकेट लिए । नौ ओभर बलिङ गरेका उनले दुई मेडन राख्दै ३१ रन खर्चिए । वनिन्दु हसरंगाले दुई विकेट लिए । लहिरु कुमारा र दिल्सान मदुसन्का र दसुन सनाकाले समान एक विकेट लिए ।

त्यसअघि टस जितेर ब्याटिङमा आएको श्रीलंकाले ४७.४ ओभरमा सबै विकेट गुमाएर २१३ रनको योगफल खडा गरेको थियो ।

श्रीलंकाका धनञ्जय डी सिल्भाले ९३ रन बनाए । उनले १११ बलमा आठ चौका र दुई छक्का प्रहार गरे । दिमुथ करुनारत्ने ३३, महिश थिक्षणाले २८, वनिन्दु हसरंगाले २० र कुशल मेन्डिसले १० रन बनाए ।

श्रीलंकाका ओपनर पथुम निसांका ‘रोयल डक’ भएका थिए ।

नेदरल्यान्ड्सका लोगन भान विक र बास डे लिडेले समान तीन विकेट लिए । साकिब जुल्फिकरले दुई र र्यान क्लेइनले एक विकेट लिए ।

छनोटको सुपर सिक्समा जिम्बाब्वे र ओमानसँगै वेस्ट इन्डिज, श्रीलंका, स्कटल्यान्ड र नेदरल्यान्ड छन् । सुपर सिक्सबाट शीर्ष दुई टिमले यसै वर्ष भारतमा हुने एकदिवसीय विश्वकपमा स्थान बनाउने छन् ।