काठमाडौं । आईसीसी क्रिकेट विश्वकप छनोटको समूह चरणको अन्तिम खेलमा आयरल्यान्डले युनाइटेड अरब इमिरेट्स (यूएई) विरुद्ध १३८ रनको फराकिलो जित निकालेको छ ।

छनोटको समूह 'बी' मा रहेको आयरल्यान्डको यो पहिलो जित हो । यता, आयरल्यान्डसँग पराजित यूएई भने प्रतियोगिताको समूह चरणमा जितविहीन बनेको छ ।

मंगलबार जिम्बाब्वेको बुलावाओ एथ्लेटिक क्लबमा भएको खेलमा आयरल्यान्डले प्रस्तुत गरेको ३५० रनको लक्ष्यसहित मैदान उत्रिएको यूएईले ३९ ओभरमा सबै विकेट गुमाएर २११ रनमात्र बनाउन सक्यो ।

यूएईका कप्तान मुहम्मद वसिमले ४५ रन बनाए । सचित शर्माले ४४, बसिल हमेदले ३९ र आर्यन्स शर्माले १८ रन बनाए । अली नासिर र मुहम्मद जवादुल्लाहले समान १३ रन थपे ।

यूएईलाई सस्तैमा समेट्न आयरल्यान्डका जस लिटिल, एन्डी म्याकब्रिन, जर्ज डकरेल र कर्टिस क्याम्फेरले समान दुई विकेट लिए । ब्यारी म्याकार्थीले एक विकेट हात पारे ।

त्यसअघि टस हारेपछि ब्याटिङमा आएको आयरल्यान्डले निर्धारित ५० ओभरमा चार विकेट गुमाएर ३४९ रनको योगफल खडा गरेको थियो ।

आयरल्यान्डका पाउल स्टर्लिङले १६२ रन बनाएका थिए । उनले १३४ बलमा १५ चौका र आठ छक्का प्रहार गरेका थिए । कप्तान एन्डी बलबिर्नीले ६६, ह्यारी टेक्टरले ५७, एन्डी म्याकब्रिनले २४, लोर्कान टकेरले १९ र जर्ज डकरेलले १५ न बनाएका थिए ।

यूएईका सचित शर्माले तीन विकेट लिए । अली नासिरले एक विकेट लिए ।