काठमाडौं । आईसीसी क्रिकेट विश्वकप छनोटमा स्कटल्यान्डले ओमानविरुद्ध ७६ रनको फराकिलो जित निकालेको छ ।

आइतबार जिम्बाब्वेको बुलावाओ एथ्लेटिक क्लबमा स्कटल्यान्डले प्रस्तुत गरेको ३२१ रनको लक्ष्य पछ्याउने क्रममा ओमानले निर्धारित ५० ओभरमा नौ विकेट गुमाएर २४४ रनमात्र बनाउन सक्यो ।

ओमानका नसिम खुशीले ६९ रन बनाए । सोएब खानले ३६, अकिब इल्यासले ३१, आयान खानले ३० रन बनाए । मोहम्मद नदिमले १५, जतिन्दर सिंहले १४, कश्यप प्रजापतिले १२ र फयाज बटले १० रन जोडे ।

स्कटल्यान्डका क्रिस ग्रेभेसले पाँच विकेट लिए । १० ओभर बलिङ गरेका ग्रेभेसले ५३ रन बनाए । मार्क वाट, ब्रान्डन म्याकमुलम, अद्रियन नेइल र मिचेल लियस्कले समान एक विकेट लिए ।

त्यसअघि टस हारेपछि ब्याटिङमा आएको स्कटल्यान्डले निर्धारित ५० ओभरमा सबै विकेट गुमाएर ३२० रनको योगफल खडा गरेको थियो ।

स्कटल्यान्डका म्याकमुलमले १३६ रन बनाए । उनले १२१ बलमा १४ चौका र तीन छक्का प्रहार गरे । कप्तान रिची बेरिंटनले ६० रन बनाए । टोमस म्याकिन्टोसले ३२, म्याथ्यु क्रसले २७, मार्क वाटले २५ र मिचेल लियस्कल ११ रन बनाए ।

ओमानका बिलाल खानले पाँच विकेट लिए । १० ओभर बलिङ गरेका खानले दुई मेडन राख्दै ५५ रन खर्चिए । फयाज बटले दुई र जय ओडेड्राले एक विकेट लिए ।

छनोटको समूह ‘बी’मा रहेको स्कटल्यान्डको यो तेस्रो र ओमानको चौथो खेल हो ।

छनोट प्रतियोगितामा सहभागी १० टिमलाई दुई समूहमा विभाजन गरिएको छ । समूह ‘ए’मा नेपालसँगै जिम्बाब्वे, नेदरल्यान्ड्स, वेस्ट इन्डिज र अमेरिका छन् । समूह ‘बी’मा युनाइटेड अरब इमिरेट्स (यूएई), श्रीलंका, स्कटल्यान्ड, आयरल्यान्ड र ओमान छन् ।

प्रत्येक समूहबाट शीर्ष तीन टिम सुपर सिक्समा प्रवेश गर्ने छन् । सुपर सिक्सबाट शीर्ष दुई टिम यसै वर्ष भारतमा हने एकदिवसीय विश्वकपका लागि छनोट हुने छन् ।