काठमाडौं । मुलुककै जेठो वीर अस्पताललाई बिरामीमैत्री बनाउन जनरल बेडदेखि  अप्रेसन थिएटर (ओटी)सम्मका सेवा थप गरिने भएको छ । असार अन्तिम सातादेखि सर्जिकल भवन पूर्णरूपमा सञ्चालनमा ल्याउने र साउनदेखि बर्न युनिटसमेत सुरु गर्ने अस्पतालको तयारी छ । 

जनरल बेड सबै निःशुल्क 

वीर अस्पतालका ७०० वटा जनरल बेड असार ८ गतेदेखि बिरामीका लागि निःशुल्क गरिएको छ । चिकित्सा विज्ञान राष्ट्रिय प्रतिष्ठान न्याम्स को कार्यकारी परिषद्ले जेठ ८ गते यस्तो निर्णय गरेको थियो । 

यसअघि जनरल बेडमा प्रतिबेड दुई सय रुपैयाँ शुल्क लाग्ने गरेको थियो । “वीरमा आउने बिरामीका लागि एकदिनको दुईसय रुपैयाँ जोगिए पनि धेरै राहत हुन्छ, दैनिक सातसय बिरामीलाई नै लक्षित गरी यस्तो निर्णय गरिएको हो,” न्याम्सका उपकुलति डा. भुपेन्द्र बस्नेतले भने । 

सातसय बेड निःशुल्क गरेबापत वार्षिक पाँच करोड रुपैयाँ खर्च हुने अनुमान छ । सो रकम सरकार र अस्पतालको आन्तरिक स्रोतबाट व्यहोरिने डा. बस्नतेले बताए । अस्पतालका क्याबिन र आईसीयू बेडमा भने तोकिएको शुल्क लाग्ने छ ।

एक साताभित्र थपिँदैछन् ३०० नर्स

वीर अस्पतालमा स्थायी दरबन्दीबाट तीनसय जना नर्सिङ जनशक्ति थपिँदै छ । नर्स थप गरेसँगै पाँचसय बेडको नयाँ सर्जिकल भवन पूर्ण रूपमा सञ्चालनमा ल्याउने अस्पतालको योजना छ  ।

अहिले वीरको पुरानो र नयाँ सर्जिकल भवनमा गरी ९६० बेड विस्तार भए पनि जनहशक्तिको अभावमा सबै बेडहरू प्रयोगमा आउन सकेका छैनन् । स्थायी दरबन्दीमा आएका तीनसय नर्स अबको एक साताभित्र नियुक्त हुने र योजनाअनुसार असारभित्रै नयाँ भवनलाई पूर्ण सञ्चालनमा ल्याइने डा. बस्नेतले बताए  । 

सबै विभागको दैनिक शल्यक्रियाको पालो 

नर्सिङ जनशक्ति थप गरेसँगै साताभरि सबै विभागअन्तरगतका बिरामीको शल्यक्रियाको व्यवस्था गर्ने अस्पतालको पहिलो प्राथमिकता छ । अहिले विभाग अनुसार बिरामीले शल्यक्रियाका लागि लामो समय कुनुपर्ने अवस्थालाई हटाउन सबै विभागको साताको ६ दिन नै पालो आउने गरी व्यवस्था गर्न लागिएको अस्पताल निर्देशक डा. सन्तोष पौडेलले बताए ।

त्यसका लागि अहिले सञ्चालनमा रहेका १२ वटा शल्यक्रिया कक्षलाई बढाएर १८ पुर्‍याइने डा. पौडेलको भनाइ छ । शल्यक्रिया कक्ष थपिएसँगै बिरामीलाई बढीमा दुई सातामा पालो आउने व्यवस्था गरिने छ ।

आईसीयू र एचडीयू बेड थपिने

अस्पतालले आईसीयू र इमर्जेन्सी सेवा विस्तारलाई अर्को  प्राथमिकतामा राखेको छ । हाल जनशक्तिकै अभावमा पूर्ण रूपमा सञ्चालनमा आउन नसकेको आईसीयू बेडको संख्या बढाएर ५५ बाट ६५ पुर्‍याउने डा. पौडेलको लक्ष्य छ । त्यस्तै, एचडीयू बेड ३० वटा थप गरी सञ्चालनमा ल्याइने उनले बताए । 

बिरामीको अवस्था हेरेर इमर्जेन्सीमा ‘जोन’ छुट्याइने 

वीर अस्पतालको इमर्जेन्सी कक्षमा विभिन्न महामारीका बेला एउटै बेडमा तीन जनासम्म राखेर उपचार गर्नुपरेको देखिन्छ । यो समस्या समाधानका लागि इमर्जेन्सी बेड थपसँगै बिरामीको प्रकृति हेरेर जोनहरू छुट्याउने अस्पतालको योजना छ । 

“अहिले चलिरहेको ४० बेडलाई विस्तार गरेर कम्तीमा ५० बेड इमर्जेन्सी चलाउने र बिरामीको अवस्था हेरेर रेड, एल्लो जोनहरूमा राख्ने व्यवस्था गर्न हामी लागिपरेका छौँ,” डा. पौडेलले भने । 

अहिले थप हुन लागेका नर्सहरूलाई इमर्जेन्सी र आईसीयूमा पनि खटाइने उनले बताए । 

साउनदेखि जलनको उपचार गर्ने तयारी 

वीर अस्पतालले २५ बेडको जलन उपचार कक्ष सञ्चालन गर्ने तयारी गरेको छ । सुरुमा १० वटा बेडबाट उपचार गर्ने गरी प्रक्रिया अघि बढेको उनले बताए । त्यसमध्ये तीनवटा आईसीयू र सातवटा वार्ड रहने छन् । जनशक्ति र सबै स्रोत साधन उपलब्ध भए आगामी साउनदेखि जलनको उपचार सेवा सुरु गर्न सकिने डा. पौडेलको भनाइ छ ।