काठमाडौं । आईसीसी क्रिकेट विश्वकप छनोटमा वेस्ट इन्डिजविरुद्ध नेपालले गुल्सन झालाई सातौँ र सन्दीप लामिछानेलाई आठौँ विकेटको रूपमा गुमाएको छ । 

जिम्बाब्वेका राजधानी हरारेस्थित हरारे स्पोर्ट्स क्लबमा जारी खेलको दोस्रो इनिङको ४४औँ ओभरको दोस्रो बलमा नेपालले गुल्सनलाई सातौँ विकेटको रूपमा गुमाएको हो । गुल्सन किमो पाउलको बलमा साई होपबाट क्याच भए । नेपाली टिमको खातामा गुल्सनले ४२ रन थपे । गुल्सन आउट भएपछि ब्याटिङका लागि आएका सन्दीप पनि एक रन बनाएर पभेलियन फर्किए ।

जारी खेलको ४४.३ ओभर समाप्त हुँदा नेपालले आठ विकेट गुमाएर २०४ रन बनाएको छ । 

नेपालले ओपनर कुशल भुर्तेललाई पहिलो विकेट, भीम सार्की र आसिफ शेखलाई तेस्रो विकेटको रुपमा गुमाएको थियो । भुर्तेल पाँच, भीम दुई, आसिफ २८, कप्तान रोहितकुमार पौडेल ३०, कुशल मल्ल दुई र दीपेन्द्रसिंह ऐरी २३ रनमा आउट भएका थिए ।

त्यसअघि टस हारेपछि ब्याटिङमा आएको वेस्ट इन्डिजले निर्धारित ५० ओभरमा सात विकेट गुमाएर ३३९ रनको योगफल खडा गरेको थियो ।

एकदिवसीय अन्तर्राष्ट्रिय क्रिकेटमा नेपाल र वेस्ट इन्डिजबीचको यो पहिलो खेल हो । नेपालले अन्तर्राष्ट्रिय क्रिकेटमा विश्वकप विजेतासँग खेल्न लागेको पनि यो पहिलोपटक हो ।

छनोटमा नेपालको यो तेस्रो खेल हो । नेपालले यसअघि पहिलो खेलमा जिम्बाब्वेसँग आठ विकेटले पराजय बेहोर्दा दोस्रो खेलमा भने अमेरिकाविरुद्ध ६ विकेटको जित दर्ता गरेको थियो ।

यता, वेस्ट इन्डिजको भने छनोटको यो दोस्रो खेल हो । वेस्ट इन्डिजले यसअघि पहिलो खेलमा अमेरिकाविरुद्ध ३९ रनको जित निकालेको थियो ।