काठमाडौं । आईसीसी क्रिकेट विश्वकप छनोटको आफ्नो तेस्रो खेलमा नेपालले आज दुई पटकको विश्वकप च्याम्पियन वेस्ट इन्डिजसामु चुनौती प्रस्तुत गर्दै छ । 

एकदिवसीय अन्तर्राष्ट्रिय क्रिकेटमा पहिलो पटक विश्वकप विजेतासँग खेल्न लागेको नेपाल वेस्ट इन्डिजविरुद्ध मैदान उत्रिदा अप्रत्यासित जितको खोजीमा हुनेछ । यी दुई टिमबीचको यो पहिलो एकदिवसीय अन्तर्राष्ट्रिय खेल हो ।

टिमको मुख्य प्रशिक्षकमा मोन्टी देसाई नियुक्त भएपछि नेपाल पछिल्लो समय उच्च लयमा छ । देसाई प्रशिक्षकमा नियुक्त भएयता नेपालले खेलेको २० एकदिवसीय खेलमध्ये दुई खेलमा मात्र हार बेहोरेको छ । देसाई नेपाली टिम उच्चस्तरको मञ्चमा सोहीस्तरको खेल प्रदर्शन गर्न भोको रहेको बताउँछन् ।

“उनीहरू सिक्नका लागि भोको छन् । उनीहरू यो स्तरको मञ्चमा प्रदर्शन गर्नका लागि भोको छन्,” देसाईले भने, “उनीहरू एक यस्तो प्रतिद्वन्द्वी बन्न चाहन्छन्, जसले यो स्तरका प्रतियोगितामा निकै सम्मान पाउन सकोस् । यसैकारण म उनीहरूका लागि उत्साहित छु ।”

छनोटमा नेपालको यो तेस्रो खेल हो । नेपालले यसअघि पहिलो खेलमा जिम्बाब्वेसँग आठ विकेटले पराजय बेहोर्दा दोस्रो खेलमा भने अमेरिकाविरुद्ध ६ विकेटको जित दर्ता गरेको थियो ।

यता, वेस्ट इन्डिजको भने छनोटको यो दोस्रो खेल हो । वेस्ट इन्डिजले यसअघि पहिलो खेलमा अमेरिकाविरुद्ध ३९ रनको जित निकालेको थियो ।

नेपालले पछिल्लो पाँच खेलमध्ये एक खेलमा मात्र हार बेहोरेको छ । वेस्ट इन्डिज पनि पछिल्लो पाँच खेलमध्ये एक खेलमा मात्र पराजित भएको छ । आजको खेलमा जित निकाल्ने टिमले छनोटको सुपर सिक्सको यात्रा लगभग निश्चित गर्नेछ ।

जिम्बाब्वेको राजधानी हरारेस्थि हरारे स्पोर्ट्स क्लबमा हुने खेल नेपाली समयअनुसार मध्यन्ह १२ः४५ बजेदेखि सुरु हुनेछ । 

जिम्बाब्वेमा जारी छनोट प्रतियोगितामा सहभागी १० टिमलाई दुई समूहमा विभाजन गरिएको छ । समूह ‘ए’ मा नेपालसँगै जिम्बाब्वे, नेदरल्यान्ड्स, वेस्ट इन्डिज र अमेरिका छन् । समूह ‘बी’ मा युनाइटेड अरब इमिरेट्स (यूएई), श्रीलंका, स्कटल्यान्ड, आयरल्यान्ड र ओमान छन् ।

दुई समूहबाट समान शीर्ष तीन टिम सुपर सिक्समा प्रवेश गर्ने छन् । सुपर सिक्सबाट शीर्ष दुई टिमले यसै वर्ष भारतमा हुने एकदिवसीय विश्वकपमा स्थान बनाउने छन् ।