काठमाडौं । पूर्व विश्व च्याम्पियन श्रीलंकाले सोमबार आईसीसी क्रिकेट विश्वकप छनोट प्रतियोगितामा युनाइटेड अरब इमिरेट्स (यूएई)लाई जितका लागि ३५६ रनको लक्ष्य पेस गरेको छ ।

जिम्बाब्वेको बुलावायोस्थित क्विन्स स्पोट्स क्लबमा टस हारेर ब्याटिङका लागि निम्त्याएको श्रीलंकाले निर्धारित ५० ओभरमा ६ विकेट गुमाएर ३५५ रनको बनाएको हो ।

१९९६ मा विश्वकपको उपाधि जित्न सफल श्रीलंकाका लागि कुशल मेन्डिसले सबैभन्दा धेरै ७८ रन बनाए । सधीरा समरविक्रमाले ७३ रन बनाउँदा ओपनर पाथुम निसान्काले ५७ र दिमुथ करुणारत्नेले ५२ रन बनाए । चरिथ असलंकाले अविजित ४८ रन बनाए भने वानिन्दु हसरंगा २३ रनमा अविजित रहे ।

यूएईका अली नासरले दुई विकेट लिए । बासिल हमीद, आयान अफजल खान र रोहन मुस्तफाले एक–एक विकेट लिए ।

छनोट प्रतियोगितामा श्रीलंका र यूएई समूह ‘बी’मा छ । यस समूहमा श्रीलंका र यूएईबाहेक आयरल्यान्ड, ओमान र स्कटल्यान्ड छन् । आजै जारी अर्को खेलमा आयरल्यान्डले ओमानलाई जितका लागि २८२ रनको लक्ष्य पेस गरेको छ ।

प्रतियोगितामा पहिलो दिन समूह ‘ए’मा आयोजक जिम्बाब्वेले नेपाललाई आठ विकेटले हराएको थियो भने दुई पटकको विश्व विजेता वेष्ट इन्डिजले अमेरिकालाई ३९ रनले हराएको थियो ।

दुवै समूहका शीर्ष तीन टिमले प्रतियोगिताको सुपर–६ मा स्थान पक्का गर्नेछन् । सुपर–६ बाट शीर्ष दुई टिमले भारतमा हुने विश्वकपमा स्थान पक्का गर्नेछ ।