काठमाडौं । सरकारले ४० लाख रूपैयाँभन्दा बढी आय भएका प्राकृतिक व्यक्तिहरूको पहिचान गर्न सक्ने व्यवस्था गरेको छ । ४० लाख रुपैयाँ आय भएका कतिपयले आय विवरण पेस नगर्ने पाइएको भन्दै त्यसलाई सही पहिचान गर्न आन्तरिक राजस्व विभागले प्रणाली बनाएको हो ।

४० लाखभन्दा बढी आय भएकाहरूको विवरण ‘टीडीएस–इन्कम ट्याक्स रिपोर्टस्–पीपीएएन ट्रान्जेक्सनभित्र पीपीएएन इन्कम फर्म इटीडीएस एबोभ फोर्टी लाख समरी रिपोट’बाट करदाताको विवरण हेर्न सकिने व्यवस्था गरिएको छ ।

ठूला करदाता कार्यालय, मध्यमस्तरीय करदाता कार्यालय, सबै आन्तरिक राजस्व कार्यालय र करदाता सेवा कार्यालयहरूले यो सिस्टम यस्ता विवरण हेर्न सक्नेछन् । टीडीएस भने अहिले परीक्षणमा रहेको बताइएको छ ।

“कतिपय करदाताको विवरण हेर्दा ४० लाख रुपैयाँभन्दा बढीको आय भएकोमा अग्रिम करकट्टी न्यून कट्टी गरेको देखिन्छ । अतः कार्यालयहरुबाट टीडीएस परीक्षणको क्रममा ४० लाख रुपैयाँ वा सोभन्दा बढी आय हुने करदाताको विवरण हेरेर नियमानुसार टीडीएस रकम दाखिला गरे/नगरेको, विवरण दिए/नदिएकोलगायतका टीडीएससम्बन्धी हेर्नुपर्ने सबै विषयको चेक जाँच, परीक्षणसम्बन्धी सम्पूर्ण कार्य गरी सोको प्रगति ईआइएमएसमा प्रविष्ट गर्नुहुन आदेशानुसार अनुरोध छ,” विज्ञप्तिमा भनिएको छ ।